პროკურატურის ინფორმაციით, 2016 წლის 28 იანვარს თურქეთში მომხდარი საქართველოს მოქალაქეების განზრახ მკვლელობის ფაქტზე მარნეულში მცხოვრები ელნურ ანტესოვი, ვუგარ გულიევი და აზადე ომაროვა დააკავეს.

უწყების ცნობით, 2016 წლის 29 იანვარს, თურქეთის სამართალდამცველების მიერ დუზჯეში ერთერთ საცხოვრებელ სახლში საქართველოს მოქალაქეების - ემმა შარიფოვას და სახიბ გასანოვის, ასევე თურქეთის მოქალაქის ელნაზ შარიფოვას გვამები იპოვეს.

გამოძიებამ დაადგინა, რომ ელნაზ შარიფოვა, ემა შარიფოვა და მისი შვილიშვილი სახიბ გასანოვი სამუშაოდ იმყოფებოდნენ თურქეთში, ფინანსურად ეხმარებოდნენ მარნეულში მცხოვრებ ოჯახის წევრებს. უწყების ცნობით, 6 იანვარს მათთან სტუმრად ჩავიდა მარნეულში მცხოვრები აზადე ომაროვა, 26 იანვარს ელნურ ანტესოვი, რომელსაც ახლო ურთიერთობა ჰქონდა ომაროვასთან და მისგანვე გახდა ცნობილი ზემოაღნიშნულ პირთა საცხოვრებელი ადგილი:

"ელნურ ანტესოვი სტამბულში შეხვდა მის მეგობარს ვუგარ გულიევს, რის შემდეგაც 28 იანვარს გამთენიისას, ისინი აზადე ომაროვას დახმარებით მივიდნენ ემა და ელნაზ შარიფოვების საცხოვრებელ სახლში. ვინაიდან ბრალდებულებისთვის წინასწარ იყო ცნობილი თანხის არსებობის შესახებ, მისი დაუფლების მიზნით, ჯგუფურად, განსაკუთრებული სისასტიკით ჩაიდინეს სამი პირის მკვლელობა. აღსანიშნავია, რომ გარდაცვლილებს სხეულზე აღენიშნებოდათ ბასრი საგნით მიყენებული მრავლობითი სახის ჭრილობები".

პროკურატურის ინფორმაციით, მკვლელობის შემდეგ ბრალდებულები დაეუფლნენ გარდაცვლილების კუთვნილ პერსონალურ კომპიუტერს, მობილურ ტელეფონებს, ასევე სხვა ნივთებს და შემთხვევის ადგილიდან მიიმალნენ. მკვლელობის მომდევნო დღეს კი ბრალდებულებმა დატოვეს თურქეთის ტერიტორია და სარფის სასაზღვრო გამშვები პუნქტის გავლით გადმოკვეთეს საქართველოს სახელმწიფო საზღვარი.

უწყების ინფორმაციით, გამოძიება გრძელდება საქართველოს სისხლის სამართლის კოდექსის 109-ე მუხლის მე-2 ნაწილის ე ქვეპუნქტით და ამავე მუხლის მე-3 ნაწილის ა და გ ქვეპუნქტებით, რაც სასჯელის სახედ და ზომად ითვალისწინებს თავისუფლების აღკვეთას თექვსმეტიდან ოც წლამდე ვადით ან უვადოდ.