ცესკოს განცხადებით, 8 ოქტომბრამდე ადაპტირებული საარჩევნო უბნების რიცხვის გაზრდა იგეგმება. საპარლამენტო არჩევნებისთვის შეზღუდული შესაძლებლობების მქონე პირთა სრულფასოვანი მონაწილეობის საკითხზე დღეს იმსჯელეს ცესკოში. კომისიის განცხადებით, ამჟამად, 3634 უბნიდან 1103 უბანია ადაპტირებული.

ცესკოს თავმჯდომარის მოადგილის, გიორგი შარაბიძის განცხადებით, უმნიშვნელოვანესია ინკლუზიური საარჩევნო გარემოს უზრუნველყოფა, რათა თითოეულ მოქალაქეს, მისი ფიზიკური შესაძლებლობის მიუხედავად, თანაბარი წვდომა ჰქონდეს საკუთარი კონსტიტუციური უფლების განხორციელების პროცესში.

ცესკოს თავმჯდომარის მოადგილე გიორგი შარაბიძე საქართველოს რეგიონული განვითარების მინისტრის მოადგილე ეკა სეფაშვილს, საქართველოს განათლების მინისტრის მოადგილე თამაზ მარსაგიშვილსა და თბილისის მუნიციპალიტეტის მერის მრჩეველ კახა ცეცხლაძეს შეხვდა.

დღევანდელი შეხვედრა ცესკოსა და ზემოაღნიშნულ უწყებებს შორის, 2015 წელს გაფორმებული მემორანდუმის ფარგლებში გაიმართა, რომლის მიზანია საქართველოს პარლამენტის 2016 წლის 8 ოქტომბრის არჩევნებისთვის საარჩევნო უბნების ადაპტირების უზრუნველყოფა.