საქართველოს ყოფილი პრეზიდენტი, მიხეილ სააკაშილი ამბობს, რომ საქათველოს იუსტიციის უმაღლესი საბჭოს წევრი, ანა დოლიძე ჰააგის სასამართლოში საქართველოს ჯარისკაცების გასამტყუვნებლად რუსეთთან თანამშრომლობდა. ასე გამოეხმაურა სააკაშვილი ყოფილი ჯარისკაცი, არჩილ ტატუნაშვილის ცხინვალის რეგიონში გარდაცვალებას.

"არჩილ ტატუნაშვილმა გიორგი ანწუხელიძის მსგავსად უარი თქვა ოკუპანტებისთვის ქედის მოდრეკაზე. ვისაც მის წამებით მკვლელობაზე უნდა ეპასუხა, ივანიშვილმა ციხეში ჩასვა (რომა შამათავა და სხვები). თან თბილისში ზის ხელისუფლება, რომელმაც გადასცა რუსეთს ჩვენი მებრძოლების სიები და მთელი ეს პერიოდი წულუკიანი ლობირებს ჰააგის სასამართლოში საქართველოს ჯარისკაცების გამტყუნებას, ხოლო პრეზიდენტ მარგველაშვილის თანამშრომელი ანა დოლიძე პირდაპირ რუსულ ორგანიზაციასთან თანამშრომლობდა ამ საკითხში. ესაა უტყუარი ფაქტები და ამიტომ, სანამ ქვეყანას ივანიშვილი მართავს, ახალ დიდ უბედურებებს უნდა ველოდოთ", - წერს სააკაშვილი ფეისბუქში.

მსგავსი ბრალდება ისმოდა იუსტიციის უმაღლესი საბჭოს წევრის სერგო მეთოფიშვილისგანაც. მან განცხადა, რომ ანა დოლიძე ორგანიზაცია "რუსეთის მართლმსაჯულების ინიციატივასთან" თანამშრომლობდა და ამ ორგანიზაციას სასამართლოში საქართველოს წინააღმდეგ სარჩელები აქვს შეტანილი.

ანა დოლიძემ მსგავსი ინფორმაციის გავრცელებას მის მიმართ დაგეგმილი შავი პიარკამპანია უწოდა და განმარტა, რომ ამით მართლმსაჯულების პრობლემებიდან ყურადღების გადატანა სურთ. მისი თქმით, ორგანიზაცია, რომელთანაც ის თანამშრომლობდა მიზნად ისახავს რუსეთის გასამართლება ადამიანის უფლებათა დარღვევისათვის.