თბილისის მერიის ბიბლიოთეკების რეფორმის ფარგლებში, პერსონალს საკვალიფიკაციო ტესტირების გავლა მოუწევს. მერის მოადგილის, სოფიო ხუნწარიას თქმით, ხელფასების მატებისთვის, პერსონალმა გარკვეულ სტანდარტებს უნდა უპასუხოს.

მისი განმარტებით, ორი თვის განმავლობაში, თითოეული თანამშრომლის გადამზადება მოხდება, ტესტირების წარმატებით გავლის შემდეგ კი, ისინი თბილისის მერიის მიერ დაფუძნებულ ახალ ა(ა)იპ-ში დასაქმდებიან.

ხუნწარიამ განცხადება დღეს, 22 თებერვალს ბიბლიოთეკარებთან შეხვედრისას გააკეთა. მისი თქმით, ახალი ა(ა)აპ-ის შექმნა აუცილებელია, რადგან ბიბლიოთეკა დღეს კულტურის სამინისტროს სსიპ-ია და თბილისის მერია აფინანსებს, რაც სამართლებრივად გაუმართავია.

ბიბილიოთეკებთან დაკავშირებით დაგეგმილ რეფორმებს ბიბლიოთეკარების მხრიდან პროტესტი მოჰყვა. მათი თქმით, რეფორმის ფარგლებში მათ შესაძლოა სამუშაო ადგილები დაკარგონ.

თბილისის მერის მოადგილემ რეფორმის აუცილებლობის მიზეზად ბიბლიოთეკებში მკითხველისა და იქ დასაქმებული თანამშრომლებისთვის შეუსაბამო გარემო და ანაზღაურება დაასახელა.

"მძიმე მდგომარეობაა ბიბლიოთეკარებისთვისაც, რადგან მათ გაუსაძლის მდგომარეობაში უწევთ მუშაობა. გარემო შეუსაბამოა, მკითხველისთვისაც. ასევე, მიგვაჩნია, რომ ბიბლიოთეკარებს ის დაბალი ხელფასი, რაც დღეს აქვთ, არ უნდა ჰქონდეთ", - თქვა ხუნწარიამ.