არასამთავრობო ორგანიზაციების ნაწილი რადიო თავისუფლების სათავო ოფისს, კონფლიქტისა და რადიოს ქართული სამსახურის მომავლის შესახებ, ღია და გამჭვირვალე ინფორმაციის დაინტერესებული საზოგადოებისთვის მიწოდებას სთხოვენ. ამ შინაარსის წერილით 11-მა არასამთავრობო ორგანიზაციამ რადიო თავისუფლების პრეზიდენტსა და ვიცე-პრეზიდენტს მიმართა.

"ყალბი ახალი ამბების და ჰიბრიდული ომების ეპოქაში, ხარისხიანი ჟურნალისტიკა სერიოზული გამოწვევების წინაშე დგას. ბევრი ჩვენგანისთვის რადიო თავისუფლების ქართულენოვანი პროდუქტი უმაღლესი პროფესიული სტანდარტებისა და ეთიკური ჟურნალისტიკის მაგალითია", - აღნიშნულია განცხადებაში.

არასამთავრობო ორგანიზაციები აღნიშნავენ, რომ რადიო თავისუფლების ქართული სამსახური და მისი ადგილობრივი ბიურო მუდამ ცდილობდა ინოვაციების დამკვიდრებას ქართულ ჟურნალისტიკაში, ბლოგების გამოქვეყნებით, მობილური ტელეფონით რეპორტინიგითა თუ მულტიმედია ფორმატების ათვისებით.

"ვიმედოვნებთ, რადიო თავისუფლების მენეჯმენტი დაგვარწმუნებს იმაში, რომ ამ პროფესიონალთა გუნდის მიერ წარმოებული ჟურნალისტიკა კვლავ მოთხოვნადია", - ვკითხულობთ მიმართვაში.

განცხადებას ხელს აწერენ:

  • ადამიანის უფლებების სწავლებისა და მონიტორინგის ცენტრი;
  • ინფორმაციის თავისუფლების განვითარების ინსტიტუტი;
  • კოალიცია მედიის ადვოკატირებისათვის;
  • ლიბერალური აკადემია-თბილისი;
  • მედიაკლუბი;
  • მცირე და საშუალო ტელეკომის ოპერატორების ასოციაცია;
  • საერთაშორისო გამჭვირვალობა საქართველო საქართველოს;
  • ახალგაზრდა იურისტთა ასოციაცია;
  • საქართველოს ჟურნალისტური ეთიკის ქარტია;
  • ჟურნალისტიკის რესურსცენტრი;
  • ფონდი ღია საზოგადოება-საქართველო.

25 იანვარს, რადიოს ქართულმა ბიურომ განაცხადა, რომ უთანხმოების გადაჭრის გზად მენეჯმენტმა ქართული სამსახურის დირექტორის, დავით კაკაბაძის გათავისუფლება დაისახა, რასაც მოჰყვა რედაქციის სრული შემადგენლობის წერილობითი პროტესტი RFE/RL-ის პრეზიდენტის, ტომ კენტის სახელზე. კაკაბაძის გადაყენების შემდეგ თანამდებობა დატოვა რადიო თავისუფლების თბილისის ბიუროს ხელმძღვანელმა, მარინა ვაშაყმაძემ.