ევროკავშირის საგარეო ქმედებათა სამსახური აზერბაიჯანელი ჟურნალისტის, აფგან მუხტარლის სასჯელს ეხმაურება. პრესსპიკერის განცხადებაში ნათქვამია, რომ მუხტარლის საქართველოდან სავარაუდო გატაცება, რასაც შემდეგ მისი დაკავება და სამართლებრივი დევნა მოჰყვა აზერბაიჯანში, საფუძვლიან და გამჭვირვალე გამოძიებას საჭიროებს:

"აზერბაიჯანელი ჟურნალისტისთვის, აფგან მუხტარლისთვის 6-წლიანი პატიმრობის მისჯა, ფუნდამენტური უფლებების, მათ შორის გამოხატვის თავისუფლებისა და მედიის თავისუფლების კუთხით აზერბაიჯანში, სერიოზულ კითხვებს აჩენს.

ყველა ის დაპატიმრების საქმე, რაც ადამიანის ძირითადი უფლებებს უკავშირდება, აზერბაიჯანმა სასწრაფოდ უნდა გამოიძიოს და გაათავისუფლოს ყველა დაკავებული, მის მიერ აღებული საერთაშორისო ვალდებულებების შესაბამისად".

აფგან მუხტარლის საქმის განხილვა ბელაქანის რაიონულ სასამართლოში 12 იავნარს დასრულდა. აზერბაიჯანელ ჟურნალისტს 6-წლიანი პატიმრობა მიუსაჯეს. მას აზერბაიჯანში საზღვრის უკანონო კვეთასა და 10 ათასი ევროს არადეკლარირებულად გადატანას ედავებიან.

მუხტარლის ცოლი ლეილა მუსტაფაევა აცხადებს, რომ თავისი ქმრის მიმართ დღეს, 12 იანვარს ბაქოში გამოტანილი განაჩენი, აზერბაიჯანისა და საქართველოს ხელისუფლების ერთობლივი გადაწყვეტილებაა:

"ეს არის ორგანიზებული დანაშაული, რომელიც საქართველოში დაიწყო და აზერბაიჯანში გაგრძელდა. ის საქართველოში გაიტაცეს 8 თვის წინ. ორივე ქვეყნის მთავრობაა პასუხისმგებელი მის დაკავებაზე".

თბილისიდან 29 მაისს გაუჩინარებული ჟურნალისტი, აფგან მუხტარლი, რომელიც მეორე დღეს ბაქოს ციხეში აღმოჩნდა, ამბობს, რომ ის საქართველოს დედაქალაქიდან კრიმინალური პოლიციის ფორმიანმა პირებმა გაიტაცეს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს და მას უკვე შეეფარდა სამთვიანი წინასწარი პატიმრობა.

მუხტარლის დაკავებიდან რამდენიმე კვირაში, აზერბაიჯანის მმართველი გუნდის პარლამენტარმა ელმან ნასიროვმა რადიო თავისუფლებასთან ინტერვიუში თქვა, რომ მუხტარლის დაკავება აზერბაიჯან-საქართველოს სპეცსამსახურების წარმატებული ოპერაცია იყო.