საქართველოს მთავარი პროკურატურა თბილისის საბავშვო ბაღებში თანხების შესაძლო გაფლანგვის საქმეს იძიებს. პროკურატურამ დღეს განცხადება გაავრცელა და აღნიშნა, რომ საქმის გამოძიება 24 ნოემბერს დაიწყო.

უწყებაში აცხადებენ, რომ თბილისის მერიის შიდა აუდიტისა და მონიტორინგის საქალაქო სამსახურის დასკვნის მიხედვით, შპს ელფმა, რომელიც საბავშვო ბაღებს საკვებით ამარაგებდა, სავარაუდოდ ხელოვნურად, მომსახურების ღირებულება გაზარდა.

პროკურატურაში აღნიშნავენ, რომ შპს ელფის მიმართ პრეტენზიები არსებობს უფასო სასადილოების მომსახურების ნაწილში გამოცხადებულ ტენდერზეც. ამ შემთხვევაში საუბარია სახელმწიფო პროგრამით გათვალისწინებულ ტენდერებში გამარჯვებული პირების მიერ სახელმწიფოს კუთვნილი დიდი ოდენობით თანხების მოტყუებით შესაძლო დაუფლებაზე. საგამოძიებო უწყებაში აღნიშნავენ, რომ მათ პარტია ახალმა საქართველომ მიმართა, საიდანც ირკვეოდა, რომ უფასო სასადილოების ფარგლებში გამოცხადებულ ტენდერებში გამარჯვებული კომპანიები გამგეობებს ყოველდღიურად ბენეფიციარების გაზრდილ რაოდენობას წარადგენდნენ და დამზადებული საკვები ხარისხს არ შეესაბამებოდა.

"ზემოაღნიშნულიდან გამომდინარე სახელმწიფო ტენდერში გამარჯვებული კომპანიების მხრიდან შესაძლოა ადგილი ჰქონდეს დოკუმენტებში ბენეფიციარების რეალური რაოდენობის შესახებ ხელოვნურად გაზრდილი მონაცემების შეტანითა და შესაბამის გამგეობებში წარდგენით სახელმწიფო ბიუჯეტიდან გამოყოფილი თანხების მოტყუებით დაუფლებას, რის შესწავლასაც მიმდინარე გამოძიების ფარგლებში ახორციელებს საქართველოს პროკურატურა", - აღნიშნავენ პროკურატურაში.

შპს ელფის წარმომადგენლები მიიჩნევენ, რომ მათი კომპანიის შესახებ დაწყებული გამოძიება შესაძლოა ახალ ტენდერში მათი მონაწილეობის ხელშეშლას ისახავს მიზნად.