თბილისის მერის, კახა კალაძის თქმით, მშენებლობების მიმდინარეობისას დარღვევების გამო ბოლო ხუთ დღეში 100-ზე მეტი მშენებარე ობიექტი სიტყვიერად გააფრთხილეს, 50 მშენებარე ობიექტზე კი საქმის წარმოება და ჯარიმების გამოწერა დაიწყო. კალაძემ მშენებლობის დროს დაშვებულ დარღვევებზე თბილისის მთავრობის სხდომაზე დღეს, 6 დეკემბერს, ისაუბრა.

"თუ ზედამხედველობის სამსახურის მითითებები არ იქნება გათვალისწინებული, თქვენ გაქვთ იმის შესაძლებლობა, რომ მშენებლობები გააჩეროთ. ამიტომ, ძალიან მკაცრები უნდა ვიყოთ ამ მიმართულებით, როდესაც საქმე ჩვენი თანამოქალაქეების სიცოცხლეს ეხება. ჩვენი თანამოქალაქეების სიცოცხლე, ჯანმრთელობა და უსაფრთხოება ის საკითხია, რაზეც თბილისის მერია ძალიან პრინციპული, მკაცრი და ამასთანავე, ძალიან მომთხოვნიც იქნება", - განაცხადა თბილისის მერმა.

მისივე თქმით, აუცილებლად უნდა იყოს დაცული საქართველოს მთავრობის (N361-ე და N477-ე) დადგენილებები. ყველა ის დეველოპერი კი, რომელიც დადგენილ წესებს არ დაიცავს, კანონის წინაშე აგებს პასუხს.