საქართველოს ეროვნული ბანკის პრეზიდენტი, კობა გვენეტაძე ამბობს, რომ მცურავი გაცვლითი კურსის პირობებში შეუძლებელია ლარის კურსის პროგნოზირება. ამის შესახებ გვენეტაძემ დღეს, 4 დეკემბერს განაცხადა.

"იმის ფონზე, რომ არის გაუმჯობესება საგარეო ფაქტორების მხრიდან დიდი ალბათობით შესაძლებელია, რომ მოლოდინებს ეთამაშა თავის როლი, მაგრამ ისევ და ისევ ამის სრული ანალიზი შესაძლებელი იქნება გარკვეული პერიოდის შემდეგ", - განაცხადა ეროვნული ბანკის პრეზიდენტმა.

მისვე თქმით, იმ შემთხვევაში, თუ ეროვნული ვალუტის კურსი გარკვეული პერიოდის განმავლობაში წონასწორობის კურსისგან გადახრილი იქნება, რამაც შესაძლოა, ინფლაცია გამოიწვიო, ეროვნული ბანკი მონეტარულ პოლიტიკას გაამკაცრებს.

ლარი უცხოურ ვალუტებთან აშშ დოლართან და ევროსთან ბოლო რამდენიმე კვირის განმავლობაში უფასურდება. ერთი ევროს ღირებულებამ 2017 წლის ნოემბერში პირველად გადააჭარბა სამ ლარს.

ხვალიდან, 5 დეკემბრიდან, 1 ევრო 3,2057 ლარი ღირს, 1 აშშ დოლარი კი - 2,7055 ლარი.