საპატრიარქო ტახტის მოსაყდრემ, მეუფე შიო მუჯირმა განაცხადა, რომ მოსაყდრის ვალდებულებები მას შემდეგ დაკონკრეტდება, რაც პატრიარქი ილია მეორე ბათუმიდან ჩამოვა.

"უწმინდესს სრული უფლება აქვს ეს გადაწყვეტილება მიიღოს. ჩვენთვის მოულოდნელი იყო თავად ეს გადაწყვეტილება", - განაცხადა მეუფემ.

დღეს, 26 ნოემბერს, მოსაყდრედ დასახელების შემდეგ პირველად მეუფე შიომ სამების საკათედრო ტაძარში წირვა აღავლინა და ქადაგება წაიკითხა.

საქართველოს მართლმადიდებელი ეკლესიის პატრიარქმა ილია მეორემ საპატრიარქო ტახტის მოსაყდრედ მიტროპოლიტი შიო მუჯირი 23 ნოემბერს დანიშნა და ქაშუეთის ეკლესიაში მრევლს გააცნო.

საპატრიარქო ტახტის მოსაყდრე ეკლესიას მართავს იმ დროს, როცა პატრიარქი ვერ ასრულებს თავის მოვალეობებს, მისი გარდაცვალების ან გადადგომის შემთხვევაში, ახალი პატრიარქის არჩევამდე. მოსაყდრის დანიშვნიდან 40 დღის შემდეგ, არა უგვიანეს ორი თვისა, იგი ეკლესიის გაფართოებულ კრებას იწვევს, რომელზეც ახალ პატრიარქს აირჩევენ.

გაიგეთ მეტი: პრეზიდენტისა და ლევან ვასაძის ბავშვობის მეგობარი - ვინ არის პატრიარქის მოსაყდრე