საერთაშორისო გამჭვირვალობა - საქართველო სახელმწიფო აუდიტის სამსახურს თბილისის მერიაში სავარაუდო კორუფციის ფაქტებთან დაკავშირებით დასკვნის გამოქვეყნებისკენ მოუწოდებს. ამის შესახებ დღეს, 21 ნოემბერს, ორგანიზაციის ხელმძღვანელმა რუსთავი 2-თან ისაუბრა.

"ვფიქრობთ, რომ ძალიან მნიშვნელოვანია საზოგადოებამ არ დაივიწყოს და ბოლომდე მოითხოვოს ამ ფაქტებთან დაკავშირებით გამოძიება... ჩვენ ვფიქრობთ, რომ არის მცდელობა საზოგადოებას დაავიწყდეს ეს პრობლემატური საკითხები და იმედი აქვთ, რომ რეაგირება აღარ იქნება", - ამბობს გიგაური და დასძენს, რომ აუცილებელია აუდიტის სამსახურმა დაამტკიცოს თავისი დამოუკიდებლობა.

აუდიტის სამსახურში დღეს აცხადებენ, რომ რამდენიმე თვის წინ თბილისის მერიაში შესაძლო კორუფციის ფაქტებთან დაკავშირებით ინფორმაციის გასაჯაროება იმ დროინდელი მენეჯმენტის გადაწყვეტილება იყო.

"იმ მენეჯმენტის გადაწყვეტილებით, მაღალი საზოგადოებრივი ინტერესიდან გამომდინარე, მიღებული იქნა გადაწყვეტილება, რომ გამოქვეყნებულიყო შუალედური ინფორმაცია და არა შუალედური დასკვნა", - აცხადებს რუსთავი 2-თან საუბრისას აუდიტის სამსახურის წარმომადგენელი, გიორგი მამრიკიშვილი.

აუდიტის სამსახურმა თბილისის მერიაში შესაძლო კორუფციის ფაქტებთან დაკავშირებით ინფორმაცია რამდენიმე თვის წინ გაავრცელა. ინფორმაციის გავრცელებას წინ უსწრებდა უწყების ხელმძღვანელს, ლაშა თორდიასა და საქართველოს ყოფილი მთავარ პროკურორს, ოთარ ფარცხალაძეს შორის მომხდარი ინციდენტი. თორდიამ თავდასხმა აუდიტის სამსახურის მიერ ფარცხალაძის შესახებ მასალების მოგროვებას დაუკავშირა და აღნიშნა, რომ ყოფილ პროკურორს დაუსჯელობის განცდა აქვს.