მთავრობის ფორმირებაზე მოლაპარაკებების ჩაშლის გამო, გერმანიის ლიდერს, ანგელა მერკელს საპარლამენტო უმრავლესობის გარეშე მართვას ახალი არჩევნების ჩატარება ურჩევნია.

მერკელის პარტია, რომელსაც ბუნდესტაგში უმრავლესობა აქვს მოპოვებული, რამდენიმე კვირაა სხვა პარტიებთან, სოციალ-დემოკრატებთან, ქრისტიან სოციალურ გაერთიანებასთან, თავისუფალ დემოკრატებთან და მწვანეთა პარტიასთან კოალიციის ჩამოყალიბებას ცდილობს. თუმცა პარტიები ვერ შეთანხმდნენ რამდენიმე საკითხზე, როგორიცაა მაგალითად ლტოლვილთა უფლება, შეუერთდნენ თავიანთ ოჯახებს გერმანიაში. გეგმა მას შემდეგ ჩაიშალა, რაც ლიბერალური პარტია თავისუფალი დემოკრატები (FDP) შეხვედრიდან ენერგეტიკისა და მიგრაციის პოლიტიკებზე შეუთანხმებლობის გამო გამოვიდა.

"ძალიან სკეპტიკურად ვარ განწყობილი და ვფიქრობ, ახალი არჩევნები საუკეთესო გამოსავალია", - უთხრა მერკელმა გერმანულ მაუწყებელს და მზაობა გამოთქვა, რომ პარტიას საარჩევნო პერიოდში გაუძღვეს.

მერკელს მოლაპარაკებების სხვა დეტალებზე არ უსაუბრია და განაცხადა, რომ ახლა ქვეყნის მომავალი ნაბიჯები გერმანიის პრეზიდენტზე, ფრანკ-ვალტერ შტაინმაიერზეა დამოკიდებული.

თავად შტაინმაიერი პარტიებს თანამშრომლობისკენ მოუწოდებს. თუმცა მერკელი ერთადერთი ლიდერი არაა, რომელიც სკეპტიციზმზე საუბრობს. მარტინ შულცი, სოციალ-დემოკრატების (CDU) ლიდერი ასევე მიიჩნევს, რომ ახალი არჩევნების ჩატარება "სწორი გზაა."