თბილისის ახალი ვიცე-მერი, ირაკლი ხმალაძე ამბობს, რომ თბილისის 2018 წლის ბიუჯეტში რამდენიმე მნიშვნელოვან საკითხთან დაკავშირებით ცვლილებები შევა. მისი თქმით, მომავალი წლის 815 მილიონიანი ბიუჯეტი გაიზრდება.

"ჩვენ საშემოსავლო ნაწილში შენიშვნები არ გვაქვს, თუმცა ხარჯვით ნაწილში მნიშვნელოვან ცვლილებებს შევიტანთ. გრძელდება კონსულტაციები ფინანსთა სამინისტროსთან, რათა დედაქალაქის ბიუჯეტი გაიზარდოს და ეს თანხა მოხმარდეს ის პროექტების განხორციელებას, რომელიც ჩვენ დავპირდით მოსახლეობას", - განაცხადა თბილისის ახალმა ვიცე-მერმა.

დღეს, 20 ნოემბერს, თბილისის მერმა, კახა კალაძე თბილისის მთავრობის სხდომაზე ვიცე-მერს თბილისის საკრებულოდან ბიუჯეტის დოკუმენტის გამოთხოვა სთხოვა. კალაძის თქმით, ცვლილებების შემდეგ ბიუჯეტში ის პრიორიტეტები იქნება ასახული, რომელიც წინასაარჩევნო პერიოდში დაპირებების სახით იყო ნათქვამი.