განახლება: ცრუ შეტყობინებასთან დაკავშირებით შსს-მ გამოძიება სისხლის სამართლის კოდექსის 331-ე მუხლით დაიწყო, რაც ტერორიზმის შესახებ ცრუ შეტყობინებას გულისხმობს. დანაშაული ისჯება ჯარიმით ან გამასწორებელი სამუშაოთი ვადით ერთიდან ორ წლამდე ანდა თავისუფლების აღკვეთით ვადით ორიდან ხუთ წლამდე.

თბილისის საერთაშორისო აეროპორტში სამართალდამცავებმა საეჭვო ვერაფერი აღმოაჩინეს. როგორც შსს-ში On.ge-ს განუცხადეს, 112-ში შესული შეტყობინება ცრუ აღმოჩნდა.

აეროპორტამდე მისასვლელი გზა სამართალდამცავებს გადაკეტილი ჰქონდათ, თუმცა, უწყებაში აცხადებენ, რომ პოლიციამ დაასრულა ყველანაირი ღონისძიება და ჩვეულებრივ აღდგა აეროპორტის ფუნქციონირება.

TAV Georgia-ს პრესსამსახურმა On.ge-ს განუცხადა, რომ მგზავრთა ევაკუაციის შედეგად, სამი რეისის გაფრენა, დაახლოებით ერთი საათით შეფერხდა. მათ შორის, დაგვიანდა Air Astana-ს, Georgian Airways-სა და Zagros Airlines-ის რეისების რეგისტრაცია.

დღეს, 14 ნოემბერს, 112-ში შესული შეტყობინების საფუძველზე, თბილისის საერთაშორისო აეროპორტში ევაკუაცია გამოცხადდა.

რუსთავი 2 წერს, რომ თბილისის საერთაშორისო აეროპორტის შიდა ტერიტორიაზე საეჭვო ჩანთის არსებობის შესახებ დარეკეს.