"რას უნდა ელოდოს საქართველო აღმოსალეთ პარტნიორობის სამიტისგან, მსურს მოკლედ გიპასუხოთ - უპირობო მხარდაჭერას საქართველოს ამბიციებისადმი, გახდეს ევროკავშირის წევრი, გახდეს ყველა იმ ინსტიტუტის ნაწილი, რომელიც ჩვენ შევქმენით ევროპის დასავლეთ ნაწილში", - ამის შესახებ პოლონეთის საგარეო უწყების ხელმძღვანელმა, ვიტოლდ ვაშჩიკოვსკიმ პრესკონფერენციაზე განაცხადა.

სამი ქვეყნის - საქართველოს, პოლონეთისა და შვედეთის საგარეო საქმეთა მინისტრების შეხვედრა, დღეს, 14 ნოემბერს გაიმართა.

ვიტოლდ ვაშჩიკოვსკის განცხადებით, სამიტზე კომუნიკეს მიიღებენ, რომელიც საქართველოს ევროკავშირთან კიდევ უფრო მეტი დაახლოების პერსპექტივას შესთავაზებს.

ამასთან, მინისტრმა აღნიშნა, რომ პოლონეთი და შვედეთი მხარს უჭერენ ევროკავშირში საქართველოს სრულფასოვან წევრობას და იმედი გამოთქვა, რომ საქართველო ამ მიზანს რეფორმებისა და ძალისხმევის შედეგად უახლოეს მომავალში მიაღწევს.

საგარეო უწყების ხელმძღვანელმა პოლონეთის მხარდაჭერაზე ისაუბრა საქართველოს ევროინტეგრაციის გზაზე. ამ კონტექსტში მან "თბილისის კონფერენციაზე" აღნიშნა, რომ ეს არის შესანიშნავი ინსტრუმენტი, რათა საქართველომ ევროკავშირში გაწევრიანების მიმართულებით გაიზიაროს პოლონეთის გამოცდილება. "ჩვენი გზავნილი ევროკავშირისადმი არის - რაც უფრო მალე მით უკეთესი" - განაცხადა მინისტრმა.

ერთობლივ პრესკონფერენციაზე ვიტოლდ ვაშჩიკოვსკიმ კიდევ ერთხელ დაადასტურა პოლონეთის მტკიცე მხარდაჭერა საქართველოს ინტეგრაციის, დამოუკიდებლობისა და სუვერენიტეტის მიმართ.