ქალი პოლიტიკოსები ელენე ხოშტარიას ჯანმრთელობის მდგომარეობის გაუარესებას განცხადებით ეხმაურებიან, რომელიც რუსთავის პენიტენციური დაწესებულების წინ წაიკითხეს. მათი თქმით, "ელენე ხოშტარიას ჯანმრთელობის მიმართ პენიტენციური სისტემის დამოკიდებულება პოლიტიკური დევნის მკაფიო გამოხატულებას წარმოადგენს და არღვევს კანონის უზენაესობის და ადამიანის უფლებების დაცვის პრინციპებს.

"დღეს ქალი პოლიტიკოსები და საზოგადოების წარმომადგენლები კიდევ ერთხელ ვერთიანდებით, რათა გამოვეხმაუროთ ჩვენი თანამებრძოლის, ოთხი შვილის დედის, უკანონოდ დაკავებული ელენე ხოშტარიას ჯანმრთელობის მდგომარეობის გაუარესებას. ელენე უკვე 10 თვეა იმყოფება პოლიტიკურ პატიმრობაში და ამავდროულად, მას არ ეწევა შესაბამისი სამედიცინო დახმარება.

მშვიდობიანი პროტესტისა და აზრის გამოხატვისთვის ელენე ხოშტარიასთვის ერთი წლით და ექვსი თვით თავისუფლების აღკვეთას სცილდება ნებისმიერ სამართლებრივ ჩარჩოს. ამის გარდა, პენიტენციურ დაწესებულებაში ყოფნის პერიოდში მას არ უტარდება მისი ქრონიკული დაავადებებისთვის გადაუდებელი, საჭირო და სპეციალური სამედიცინო პროტოკოლებით გათვალისწინებული პროცედურები, რითაც მის ჯანმრთელობას შეუქცევადი ზიანი ადგება.
აღსანიშნავია, რომ თავისუფლებაზე ყოფნის დროს ელენეს ჯანმრთელობის მდგომარეობა იყო სტაბილური და სწორედ საპატიმრო დაწესებულებაში გადაყვანის შემდგომ მისი მდგომარეობა დამძიმდა, რაც სწორედ პენიტენციურ სამსახურს აკისრებს სრულ პასუხისმგებლობას.

ელენე ხოშტარიას ჯანმრთელობის მიმართ პენიტენციური სისტემის დამოკიდებულება პოლიტიკური დევნის მკაფიო გამოხატულებას წარმოადგენს და არღვევს კანონის უზენაესობის და ადამიანის უფლებების დაცვის პრინციპებს.

თავისუფლება ელენე ხოშტარიას, თავისუფლება სინდისის პატიმრებს!“ — ვკითხულობთ განცხადებაში.

საერთო განცხადების გაკეთებამდე, ერთიანი ნაციონალური მოძრაობის თავმჯდომარემ, თინა ბოკუჩავამ საზოგადოებას მოუწოდა, 20 ივნისის აქციის ძალადობრივი გზით დაშლიდან 7 წლისთავზე, შაბათის მარშს შემოუერთდნენ.

"მიუხედავად იმისა, რომ ელენე ხოშტარია, რომელიც რუსულმა რეჟიმმა ფლომასტერით წარწერის გაკეთებისთვის წელიწადი და ექვსი თვით ციხეში გამოამწყვდია, თავად არასოდეს საუბრობს თავის ჯანმრთელობის მდგომარეობაზე, მისი ადვოკატების ცნობით, მისი ჯანმრთელობის მდგომარეობა არის ძალიან მძიმე. და თუ დაუყოვნებლივ ელენეს არ ჩაუტარდა დიაგნოსტიკური კვლევები და მას არ დაენიშნა შესაბამისი მკურნალობა, ელენე შესაძლოა, ამ ციხიდან, თავის ოთხ შვილთან დასაბრუნებლად ეტლით გამოვიდეს.

ამიტომ, მოვითხოვთ, დაუყოვნებლივ ჩაუტარდეს ელენეს ყველა სამედიცინო კვლევა და დაენიშნოს მას შესაბამისი მკურნალობა.

მინდა კიდევ ერთხელ მოვუწოდო ყველას — შემოუერთდით ყოველკვირეულ შაბათის მარშს, რომელიც ამჯერად ემთხვევა გავრილოვის ღამის 7 წელს, რომლის ერთ-ერთი მთავარი გმირი სწორედ ელენე იყო. გამოდით ელენესთვის, გამოდით ყველა პოლიტპატიმრის თავისუფლებისთვის, გამოდით საქართველოს თავისუფლებისთვის, რომელიც არასოდეს გარუსდება," — განაცხადა ბოკუჩავამ.

ელენე ხოშტარიას ადვოკატის, შოთა თუთბერიძის თქმით, თურქი ექიმების შეფასებით, სათანადო მკურნალობის გარეშე, ელენე ხოშტარიას ჯანმრთელობას შესაძლოა, მიადგეს გამოუსწორებელი ზიანი და ვეღარ შეძლოს ეტლის გარეშე გადაადგილება.