ქართველოს ფინანსთა სამინისტროს საგამოძიებო სამსახურის ინფორმაციით, უწყებამ ორი პირი დააკავა, რომლებმაც ერთ-ერთი ფინანსური ორგანიზაციიდან სესხი მოტყუებით, უვარგისი ავტომობილის უზრუნველყოფით გამოიტანეს და თანხა მიითვისეს.

როგორც საგამოძიებო სამსახური აცხადებს, 2016 წლის დეკემბრიდან 2017 წლის მარტის პერიოდში, ბრალდებულებმა, სხვისი კუთვნილი ფულადი თანხის მოტყუებით დაუფლების მიზნით, შეიძინეს BMW- ს მარკის X5-ის მოდელის გაუმართავი 5 ავტომანქანა, რამდენიმე შემთხვევაში მხოლოდ ავტომანქანის ძარა. ამის შემდგომ, ერთ - ერთმა ბრალდებულმა აღნიშნული სატრანსპორტო საშუალებების უზრუნველყოფით სესხის აღების მიზნით, ფინანსურ ორგანიზაციას მიმართა.

მეორე ბრალდებულმა, ამავე ორგანიზაციის ექსპერტ - შემფასებელმა, სამსახურებრივი მდგომარეობის გამოყენებით, ავტომანქანების მდგომარეობისა და ღირებულების შესახებ ორგანიზაციის შესაბამის სამსახურს განზრახ მიაწოდა არასწორი ინფორმაცია, რომლის საფუძველზეც, ფაქტობრივად არაუზრუნველყოფილი სესხები გაიცა. შესაბამისად, როგორც სამართალდამცავი უწყება აცხადებს, ორგანიზაციამ სესხის სახით გაცემული თანხის უკან დაბრუნება ვეღარ შეძლო. დანაშაულებრივი ქმედების შედეგად, ორგანიზაციას, ჯამში, 61 157 ლარის ოდენობის ზიანი მიადგა.

საქმეზე მიმდინარეობს გამოძიება საქართველოს სისხლის სამართლის კოდექსის 180-ე მუხლის მე-3 ნაწილით, რაც სასჯელის სახით ითვალისწინებს თავისუფლების აღკვეთას 6-დან 9 წლამდე ვადით.