შალვა პაპუაშვილი დღეს გამართულ ბრიფინგზე გამოეხმაურა საქართველოში გერმანიის ელჩის პეტერ ფიშერის მიერ გამოცემა "ბათუმელებთან" გაკეთებულ განცხადებას იმის შესახებ, რომ "40 წელია გერმანიის მთავრობაში მუშაობს და არანაირი "დიფ სთეითი" არ უნახავს". პაპუაშვილის თქმით, ფიშერმა "მან მისთვის დამახასიათებელი იქედნური ტონით ისაუბრა "დიფ სთეითზე", თქვა, რომ "დაგვცინის ქართველებს, მაგრამ ის პარალელურად დასცინის აშშ-ის პრეზიდენტ ტრამპსაც".

"ამ ადამიანმა საქართველო-გერმანიის 30-წლიანი მეგობრობა 3 წელიწადში ჩამოანგრია და დაიყვანა იმ დონეზე, რომ გაიგივებულია დღთეს გერმანიის წარმომადგენელი საქართველოში ძალადობის, დეზინფორმაციის, პროპაგანდის ხელშემწყობად, წამქეზებლად და მხარდამჭრად.

მან მისთვის დამახასიათებელი იქედნური ტონით ისაუბრა "დიფ სთეითზე", რომ აბა სად არის? შევიხედე ოთახში და იქ არ იყო, გადავედი აბაზანაში და იქ არ დამხვდა, დაგვცინის ფაქტობრივად ქართველებს, მაგრამ ერთ რამეს გავუსვამ ხაზს, ის პარალელურად დასცინის ამერიკელებს, როდესაც ამბობს რომ "დიფ სთეითი" რაღაც გამონაგონია, დასცინის ამერიკის შეერთებულ შტატების პრეზიდენტ ტრამპს. ასევე, შეუძლია ამერიკის საელჩოს ელაპარაკოს ამაზე. ის დასცინის ბრიტანეთის ყოფილ პრემიერმინისტრს, რომელიც ასევე საუბრობდა "დიფ სთეითზე" ბრიტანეთში, პრინციპში, დასცინის ყველას ამ იქედნური ტონით, რომელიც ძალიან სამწუხაროა, რომ გერმანელი ადამიანისგან ასეთ ცხვირაწეულ დამოკიდებულებას ვხედავთ სხვა ხალხების მიმართ.

ქართველების მიმართ მისი დამოკიდებულება გასაგებია და შევეჩვიეთ და ვხედავთ, მაგრამ ამავდროულად დასცინის ამერიკელებს, ბრიტანელებს, გამოდის, რომ ერთი ის არის ამ ქვეყანაზე, ვისაც პრეტენზია აქვს სრულ ჭეშმარიტებაზე.

სამწუხაროა, რომ მან გარდა იმისა, რომ ძალიან დიდი ზიანი მიაყენა ქართულ გერმანულ ურთიერთობებს, მან ზოგადად ზიანი მიაყენა ელჩობის ინსტიტუტს როგორც ასეთს და ქართველების თვალში გააიგივა უცხო ქვეყნის ელჩი სტუმართან, რომელიც სახლში გივარდება, ძალადობას აქეზებს, ტყუილს აქეზებს, პროპაგანდას აქეზებს, ფაქტობრივად ელჩობა აქცია მთავარმართებლის, მეორე მმართებლის და მეორე მდივნის სინონიმად," — ამბობს შალვა პაპუაშვილი საქართველოში გერმანიის ელჩ, პეტერ ფიშერზე.

მანამდე საქართველოში გერმანიის ელჩმა პეტერ ფიშერმა "ბათუმელებთან" ინტერვიუში განაცხადა, რომ 40 წელია გერმანიის მთავრობაში მუშაობს და არანაირი "დიფ სთეითი" არ უნახავს.

"მე 40 წელია გერმანიის მთავრობაში ვმუშაობ და არანაირი "დიფ სთეითი" არ მინახავს. ვინ არის ეს "დიფსთეითი"? შეუძლიათ სახელი დაგვისახელონ? ან სახე გვაჩვენონ? როგორ შეიძლება ეს ჯგუფი ასე გავლენიანი იყოს აშშ-ში, მერე გადავიდეს ევროკავშირში, მერე დიდ ბრიტანეთში და მას ვერავინ ხედავდეს? ფაქტები სხვას ამბობს. ფაქტია, რომ ევროკავშირი და მისი წევრი ქვეყნები საქართველოს ნამდვილი მეგობრები და პარტნიორები არიან," — განაცხადა პეტერ ფიშერმა "ბათუმელებთან" ინტერვიუში.