გუშინ, 19 აპრილს, აშშ-ის, ლუიზიანას შტატში მამაკაცმა რვა ბავშვი მოკლა, მათგან შვიდი საკუთარი შვილი იყო. თავდასხმა ორ მეზობელ სახლში მოხდა. ამის შესახებ ინფორმაციას The Associated Press (AP) ავრცელებს. მათი თქმით, ეს ბოლო წლების ერთ-ერთი ყველაზე სისხლიანი მასობრივი მკვლელობაა აშშ-ში.

პოლიციის სპიკერის, კრის ბორდელონის თქმით, დაჭრილია ორი ქალიც, მათ შორის თავდამსხმელის ცოლი (ბავშვების დედა), რომლებიც კრიტიკულ მდგომარეობაში იმყოფებიან. მოკლული ბავშვები, რომლებიც ერთ სახლში იმყოფებოდნენ, 3-დან 11 წლამდე ასაკის იყვნენ.

თავდამსხმელი, 31 წლის შამარ ელკინსი, პოლიციასთან შეტაკების შემდეგ, საპასუხო სროლის შედეგად დაიღუპა. სამართალდამცავებს მომხდარის მოტივზე ჯერ არ უსაუბრიათ, თუმცა, როგორც AP წერს, დეტექტივები დარწმუნებულნი არიან, რომ ეს "მხოლოდ ოჯახურ ნიადაგზე მომხდარი ინციდენტია".

გამოძიების მიხედვით, თავდასხმა მზის ამოსვლამდე დაიწყო. ეჭვმიტანილმა ჯერ ერთ სახლში ესროლა ქალს, შემდეგ კი მეორე მისამართზე წავიდა, სადაც ბავშვები დახოცა. მოკლული შვიდი ბავშვი მეორე სახლში იპოვეს, ერთი კი სახურავზე — როგორც ჩანს, ის გაქცევას ცდილობდა. კიდევ ერთი ბავშვი სახურავიდან გადახტა და გადარჩა; ის საავადმყოფოში გადაიყვანეს.