შინაგან საქმეთა სამინისტრო ზვიად ახრახაძის გარდაცვალების შესახებ ინფორმაციას ავრცელებს. უწყების განცხადებით, ზვიად ახრახაძე ბრალდებულებთან სტუმრად მივიდა, სადაც ის შეუძლოდ გახდა და გარდაიცვალა. ბრალდებულებმა ცხედარი თბილისთან ახლოს, ტყის მასივში დატოვეს და დედაქალაქიდან რეგიონის მიმართულებით გაემგზავრნენ.

"შინაგან საქმეთა სამინისტროს თბილისის პოლიციის დეპარტამენტის თანამშრომლებმა, სისხლის სამართლის საქმეზე ჩატარებული ოპერატიული ღონისძიებებისა და საგამოძიებო მოქმედებების შედეგად, სიცოცხლისთვის საშიშ მდგომარეობაში მყოფისთვის აუცილებელი დახმარების გაუწევლობისა და სათანადო დაწესებულებისათვის შეუტყობინებლობისთვის 2 პირი: 1992 წელს დაბადებული ი.მ. და 1985 წელს დაბადებული გ.მ. დააკავეს.

გამოძიებით დგინდება, რომ მიმდინარე წლის 6 აპრილს თბილისში, გვიან ღამით, ბრალდებულებთან სტუმრად მივიდა 1995 წელს დაბადებული ზ.ა. მოგვიანებით, ის შეუძლოდ გახდა და გარდაიცვალა. ბრალდებულებმა ცხედარი — გ.მ.-ს მართვის ქვეშ არსებული ავტომობილით, თბილისთან ახლოს, ტყის მასივში დატოვეს და დედაქალაქიდან რეგიონის მიმართულებით გაემგზავრნენ.

სამართალდამცველებმა სისხლის სამართლის საქმეზე ჩატარებული საგამოძიებო მოქმედებების შედეგად, დანაშაულის ჩამდენი პირების ვინაობა დაადგინეს და ორივე მათგანი ბრალდებულის სახით დააკავეს. ბრალდებულები აღიარებენ ჩადენილ დანაშაულს და თანამშრომლობენ გამოძიებასთან.

ზ.ა.-ს გარდაცვალების ზუსტი მიზეზის დადგენის მიზნით დანიშნულია შესაბამისი ექსპერტიზები.
გამოძიება სისხლის სამართლის კოდექსის 129-ე მუხლით მიმდინარეობს," — წერს უწყება.

31 წლის ზვიად ახრახაძეს 5 აპრილის შემდეგ ეძებდნენ. მთავარის ინფორმაციით, ის ღამის 12 საათზე სამსახურიდან გამოვიდა, 3-ის ნახევარზე კი მასთან კონტაქტი სრულიად გაწყდა. ოჯახის ახლობლების ინფორმაციით ახალგაზრდა კაცი, წყნეთში, ერთ-ერთ ხევში გარდაცვლილი იპოვეს — ცხედარს სხეულზე დაზიანების კვალი ეტყობა.