უკრაინელი ოლიგარქის, ვასილ ზაიცევის 20 წლის შვილი, ოლენა ზაიცევა ბრალდებულია ავტოავარიისთვის, რომელსაც 6 ადამიანი ემსხვერპლა, 5 კი მძიმედ დაშავდა. შემთხვევა 18 ოქტომბერს ხარკოვში მოხდა.

კიევ პოსტის ცნობით, 20 ოქტომბერს ხარკოვში გამართულ სასამართლო პროცესზე ოლენა ზაიცევას წინასწარი, 60-დღიანი პატიმრობა შეუფარდეს. ზაიცევას ადვოკატი ამტკიცებდა, რომ ბრალდებულს აქამდე არასდროს არ ჰქონია დარღვევები საგზაო მოძრაობისას, ეს შემთხვევა კი მისთვის გაკვეთილია და აწი არასდროს დაჯდება საჭესთან. ადვოკატმა სასამართლოსგან მოითხოვა, რომ ბრალდებულისთვის სასამართლო სხდომამდე შინაპატიმრობა შეეფარდებინათ, რადგან მისი მტკიცებით, ზაიცევას ჯანმრთელობის მდგომარეობა არ არის სახარბიელო და მას თავის ტკივილები აწუხებს. გარდა ამისა, დაცვის მხარე ამტკიცებდა, რომ ავარიისას ზაიცევა ფხიზელი იყო. თუმცა, სულ სხვა შედეგი აჩვენა ექსპერტიზის დასკვნამ, რომლის მიხედვითაც, 20 წლის მძღოლი იყო ოპიატების ტიპის ნივთიერების გავლენის ქვეშ. ადვოკატმა მოითხოვა, რომ აღნიშნული დასკვნა საქმეში მტკიცებულებად არ ეცნოთ, რადგან მისი ვერსიით, ოპიატის კვალი ზაიცევას სხეულში შესაძლოა იმ დამამშვიდებლისგან დარჩენილიყო, რომელიც მან ავარიის შემდეგ დალია.

საქმის მასალებისა და თვითმხილველების მონათხრობის მიხედვით, ოლენა ზაიცევა ლექსუსის მარკის ავტომობილს მართავდა, არ გაჩერდა შუქნიშნის წითელ ფერზე, რა დროსაც შეეჯახა ფოლკსვაგენ ტუარეგს. აღნიშნული ავტომობილი კი ინერციით შუქნიშანზე გადასასვლელად გამზადებულ ადამიანებს დაეჯახა. მძიმედ დაშავებულთა შორისაა ორსული ქალი, გარდაცვლილთა ასაკი კი 20-35 წლამდე მერყეობს.

სასამართლო სხდომაზე ზაიცევას არ უსაუბრია ავარიის დეტალებზე, მან თქვა, რომ წუხდა შემთხვევის დროს დაშავებულებზე.

"ნამდვილად მაქვს იმედი, რომ მათი ოჯახები საბოლოოდ დათანხმდებიან ჩვენი ოჯახისგან ფინანსური დახმარების მიღებას. ეს არის ის, რაზეც ახლა ვფიქრობ", – თქვა ბრალდებულმა.

გამამტყუნებელი განაჩენის შემთხვევაში, ოლენა ზაიცევას 10 წლამდე პატიმრობა ემუქრება.