გეგმური ფრენის განხორციელებისას რუსული სამხედრო თვითმფრინავი რუსეთის მიერ ანექსირებულ ყირიმში ჩამოვარდა, რის შედეგადაც ბორტზე მყოფი ეკიპაჟის 6 წევრი და 23 მგზავრი დაიღუპა — ამის შესახებ ინფორმაციას რუსული საინფორმაციო სააგენტოები ავრცელებენ. ფაქტის შესახებ დაწყებულია სისხლის სამართლის გამოძიება უსაფრთხოების წესების დარღვევის მუხლით.

რუსული მედია წერს, რომ კატასტროფა ტექნიკურმა გაუმართაობამ გამოიწვია და თვითმფრინავზე რაიმე სახის "დამაზიანებელ ჩარევას" ადგილი არ ჰქონია. შემთხვევის ადგილზე მყოფმა წყაროებმა სახელმწიფო სააგენტოებს, Tass-სა და RIA Novosti-ს განუცხადეს, რომ სამხედრო-სატრანსპორტო თვითმფრინავი კლდეს შეეჯახა.

რუსეთის საგამოძიებო კომიტეტმა ასევე დაადასტურა ავიაკატასტროფის ფაქტი, თუმცა დაღუპულთა რაოდენობის შესახებ დეტალები არ გაუვრცელებია.

"2026 წლის 31 მარტს, ყირიმის რესპუბლიკის ბახჩისარაის რაიონში, სოფელ კუიბიშევოსთან, ფრენისას კატასტროფა განიცადა ან-26 (An-26) ტიპის თვითმფრინავმა. ბორტზე იმყოფებოდა ეკიპაჟის 7 წევრი და 23 მგზავრი", — ნათქვამია კომიტეტის განცხადებაში.

ცნობისთვის, რუსეთმა ყირიმის ანექსია უკრაინისგან უკანონოდ 2014 წელს მოახდინა და მას შემდეგ აკონტროლებს შავი ზღვის ჩრდილოეთ სანაპიროზე მდებარე ამ ტერიტორიას.

2022 წელს კრემლის მიერ უკრაინაში სრულმასშტაბიანი შეჭრის დაწყების შემდეგ, რუსული სამხედრო ავიაციის მონაწილეობით არაერთი ავიაკატასტროფა მოხდა

  • გასული წლის დეკემბერში, რუსეთის ივანოვოს ოლქში, მოსკოვის ჩრდილო-აღმოსავლეთით, An-22 ტიპის თვითმფრინავი ჩამოვარდა, რასაც ეკიპაჟის შვიდი წევრი ემსხვერპლა.
  • ორი თვით ადრე, ოქტომბერში, MiG-31 ტიპის გამანადგურებელი თვითმფრინავი ლიპეცკის ოლქში დაშვების მცდელობისას ჩამოვარდა.
  • 2024 წლის დეკემბერში, II-76 სამხედრო-სატვირთო თვითმფრინავი მოსკოვის ჩრდილო-აღმოსავლეთით მდებარე აეროდრომიდან აფრენიდან მალევე ჩამოვარდა, რის შედეგადაც ბორტზე მყოფი 15-ვე ადამიანი დაიღუპა.
  • 2022 წლის ოქტომბერში, Su-34 ტიპის ბომბდამშენი რუსეთის სამხრეთით მდებარე ქალაქ ეისკის საცხოვრებელ უბანში ჩამოვარდა.