19 მარტს, ვალერი ქოჩიაშვილმა ოკუპირებულ დონეცკთან ქვანახშირისა და ლითონის ექსპორტის შესახებ შეთანხმება გააფორმა — ინფორმაციას რადიო თავისუფლება ავრცელებს.

ოკუპირებულმა დონეცკიმ სავაჭრო ხელშეკრულება ქართულ კომპანია George Oil Limited-თან გააფორმა, რომელიც რუსული მედიების მტკიცებით "საქართველოს სახელმწიფო შესყიდვების ბაზარზე ერთ-ერთი მთავარი მოთამაშეა და რეგულარულად იგებს ტენდერებს სამთავრობო უწყებებისთვის საწვავის მიწოდების მიზნით".

რადიო თავისუფლება წერს, რომ "ჯორჯ ოილ ლიმიტედი" ქართული კომპანიაა, რომელიც საერთაშორისო ვაჭრობაშია სპეციალიზებული. 2025 წელს კომპანიამ აღმოსავლეთის ეკონომიკურ ფორუმზე ხელი მოაწერა მემორანდუმს მრეწველებისა და მეწარმეების საერთაშორისო კონგრესთან, რომელიც ითვალისწინებს ორმხრივ მიწოდებას რუსეთის შორეული აღმოსავლეთის კომპანიებთან.

"მე ახლა მაგათ წერილებიც მივწერე, თუ გინდათ დროზე გაინძერით, მე თურქები მყავს კლიენტები და ინდოელები და თუ იმათ სხვა ნახეს, აღარც თქვენი ნახშირი მინდა და არც არაფერი-მეთქი. ახლა მაგათზეა დამოკიდებული," — ამბობს ქოჩიაშვილი "რადიო თავისუფლებასთან" სატელეფონო საუბარში.

ქოჩიაშვილმა ტვ პირველს განუცხადა, რომ გააფრთხილებს ქართულ ოცნებას, რომ დაეხმარონ, თორემ მაგათ "ყურებს დააჭრის ყველას", "ივანიშვილსაც ყურებს დავაჭრი", — ამბობს ქოჩიაშვილი.

"ძალიან კარგი შეთანხმება მაქვს, გადასარევი შეთანხმება მაქვს, ყველას რომ გაუხარდება, ისეთი შეთანხმებაა და წამოვიღებთ იქიდან რაც დაგვჭირდება საქართველოს. ყველაფერი კარგად იქნება, თქვენ ნუ ნერვიულობთ," — განაცხადა ქოჩიაშვილმა ტვ პირველთან საუბრისას.

ყოფილი სამხედრო ვალერი ქოჩიაშვილი საზოგადოებისთვის ცნობილი მას შემდეგ გახდა, რაც 2025 წლის 18 მაისს ბათუმში გერმანიის ელჩ პეტერ ფიშერს თავს დაესხა და სიტყვიერი შეურაცხყოფა მიაყენა. ამ ქმედებისთვის ქოჩიაშვილი 1000 ლარით დაჯარიმდა.