საქართველოს სახელმწიფო უსაფრთხოების სამსახურს ახალი გერბი აქვს. გერბის შესახებ ბრძანებას, რომელიც უკვე განთავსებულია საკანონმდებლო მაცნეზე, სუს-ის ხელმძღვანელი მამუკა მდინარაძე აწერს ხელს და ის 24 მარტითაა დათარიღებული.

ბრძანების დანართში წერია, რომ "ფარის გარშემო ოქროს (ყვითელი) არშიის ველზე ქართული მთავრული ასოებით წრიულად დატანილია სევადის (შავი) წარწერა — "სახელმწიფო უსაფრთხოების სამსახური".

"საქართველოს სახელმწიფო უსაფრთხოების სამსახურის გერბი წარმოადგენს ვერცხლის (თეთრი) ოთხქიმიან სტილიზებულ ვარსკვლავს, რომელზეც მოთავსებულია ზემოდან ქვემოთ დაშვებული ოქროს (ყვითელი) ხმალი. ხმალზე მოთავსებულია სევადის (შავი) მრგვალი ჰერალდიკური ფარი. ცენტრში სევადის (შავი) ველზე გამოსახულია ფრთებგაშლილი ოქროს (ყვითელი) არწივი მარჯვნივ მიმართული თავით. ოქროს (ყვითელი) არწივის მკერდზე, მცირე ჰერალდიკურ ფარაკზე გამოსახულია საქართველოს სახელმწიფო დროშის სტილიზებული გამოსახულება. ფარს გარშემო შემოუყვება სევადის (შავი) არშია ოქროს (ყვითელი) ორი კანტით. შავი არშიის ზედა ნაწილში განთავსებულია ნახევარრკალით დაბოლოებული ოქროს (ყვითელი) არშია. ფარის ქვედა ნაწილში სევადის (შავი) ველზე გამოსახულია მუხის ოქროს (ყვითელი) ორი რტო", — წერია დანართში.