ოპოზიციონერი პოლიტიკოსი გივი თარგამაძე სუს-ში გამოკითხვაზე მივიდა. უწყებაში შესვლამდე მან ჟურნალისტებთან საუბრისას განაცხადა, რომ ყველა მისი განცხადება ღია წყაროებიდან მოპოვებულ ინფორმაციას ეფუძნებოდა.

"მოგესალმებით. აი, იპოვეს ჩემი თავი, როგორც იქნა და წარმოვადგინე სუსში. არ მჭირდება არანაირი სასამართლო, მითუმეტეს დამატებით სუსის კონტროლირებადი ერთი მოსამართლე ნამდვილად არ მჭირდება იმისთვის, რომ ამათ დაველაპარაკო.

რაც შეეხება სათქმელს, სათქმელი ძალიან ბევრი მაქვს. არ ვიცი მომისმენენ თუ არა, უბრალოდ, თორემ ძალიან ბევრი მაქვს. მაგალითად, ის, რომ მიხედონ საქმეს. ყველა ჩემი განცხადება ეფუძნებოდა ღია წყაროებიდან მოპოვებულ ინფორმაციას, შესაბამისად, არაფერი დასასაბუთებელი მე არ მაქვს. მათ აქვთ დასასაბუთებელი, რატომ დამიძახეს ამ განცხადებებთან დაკავშირებით, იმის მაგივრად, რომ მიხედონ საქმეს, როდესაც აქ ჰკითხავენ ჩემნაირ ადამიანებს და 300 კაცი უდგათ, რომელიც თურმე მზად არის აიათოლას ბრძანების შესასრულებლად. ახლა წავიდნენ, ის 300-ვე ადამიანი გააკონტროლონ, იმიტომ, რომ ისინი თუ გაიფანტნენ ახლა მთელ მსოფლიოში იმ დავალებებით, რაც აქვთ მიღებული, და არ იციან ამათმა რა აქვთ მიღებული, აი, მერე იქნება შარში ჩვენი ქვეყანა თუ იქნება", — განაცხადა გივი თარგამაძემ ("ტვ პირველი").

სუს-მა თარგამაძე დაკითხვაზე 7 მარტს, დაიბარა, მაგრამ შემდეგ პროსამთავრობო ტელეკომპანია "იმედში" გაავრცელა განცხადება იმის შესახებ, რომ გივი თარგამაძეს ტელეფონით ვერ უკავშირდებოდნენ. თარგამაძემ მოგვიანებით სოციალურ ქსელში დაწერა, რომ საზღვარგარეთაა და მზადაა კითხვებს ან წერილობით უპასუხოს ან მაშინ, როდესაც ქვეყანაში დაბრუნდება.

შეგახსენებთ, ჰადსონის უნივერსიტეტმა კვლევა სახელწოდებით — "საქართველოს ირანისკენ შემობრუნება: თეირანის გავლენის სწრაფი გაფართოება ოდესღაც აშშ-ის ერთგულ მოკავშირეზე" გამოაქვეყნა. კვლევა საქართველოში ირანის მზარდ გავლენას ეხება და მისი თანაავტორები ჰადსონის ინსტიტუტის უფროსი მეცნიერ-თანამშრომელი ლუკ კოფი და საბჭოთა წარსულის კვლევის ლაბორატორიის პროექტების მენეჯერი, გიორგი კანდელაკი არიან.

აღნიშნულ კვლევას საქართველოში მწვავე რეაქცია მოჰყვა. სუს-მა გამოძიება სისხლის სამართლის კოდექსის 319-ე მუხლით დაიწყო, რაც უცხო ქვეყნისათვის, უცხოეთის ორგანიზაციისათვის ან უცხოეთის კონტროლს დაქვემდებარებული ორგანიზაციისათვის მტრულ საქმიანობაში დახმარებას გულისხმობს. გამოძიების ფარგლებში უკვე დაიკითხნენ თავად გიორგი კანდელაკი, ყოფილი თავდაცვის მინისტრი თინა ხიდაშელი, ოპოზიციონერი პოლიტიკოსი გუბაზ სანიკიძე და პოლიტოლოგი გია ხუხაშვილი.