დიდი ბრიტანეთის მიერ სანქციების დაწესების შემდეგ, ირაკლი რუხაძემ და ტელეკომპანია
იმედის" სამეთვალყურეო საბჭოს 3-მა წევრმა საჯარო რეესტრს საბჭოს დატოვების მოთხოვნით მიმართეს — ინფორმაციას ნეტგაზეთი ავრცელებს.

საჯარო რეესტრის ვებგვერდის ინფორმაციით, საბჭოს დატოვების მოთხოვნით მიმართეს: სამეთვალყურეო საბჭოს თავმჯდომარე ირაკლი რუხაძემ, მისმა მოადგილეებმა — გიორგი ბახტაძემ, გიორგი კალანდარიშვილმა და დავით შონიამ. სამეთვალყურეო საბჭოში მხოლოდ ტელეკომპანიის დირექტორი, მაკა ლომაძე რჩება.

ნეტგაზეთის ინფორმაციით, რეესტრში წარდგენილ განცხადებაში ისინი განცხადების დაკმაყოფილებას დაჩქარებული წესით მოითხოვენ და ამისთვის თითოეულმა 414 ლარი გადაიხადა. საჯარო რეესტრს ჯერ მათი მოთხვნა არ დაუკმაყოფილება.

განცხადებაში საბჭოს დატოვების მიზეზად ტელეკომპანიის მფლობელის ცვლილებას ასახელებენ. ირაკლი რუხაძის ტელეკომპანიის მფლობელობიდან გასვლა 6 თებერვალს გახდა ცნობილი, ხოლო 25 თებერვალს, სანქციების დაწესებიდან მეორე დღეს, "მფლობელის ცვლილების" მიზეზით საბჭოს დატოვება მოითხოვეს.

შეგახსენებთ, 24 თებერვალს დიდმა ბრიტანეთმა, რუსეთის სანქციების რეგულაციების ფარგლებში, სამთავრობო პროპაგანდისტული "იმედი" და "პოსტვ" დაასანქცირა.

სანქცირებული კომპანიების ჩამონათვალი დიდი ბრიტანეთის საგარეო თანამეგობრობისა და განვითარების ოფისმა გამოაქვეყნა. მათ მიერ გავრცელებული დოკუმენტის მიხედვით, საგარეო საქმეთა სამინისტრო მიიჩნევს, რომ ტელეკომპანია "იმედი" განზრახ ავრცელებს შეცდომაში შემყვან ინფორმაციას რუსეთის უკრაინაში სრულმასშტაბიანი შეჭრის შესახებ, რაც მხარს უჭერს ან ხელს უწყობს პოლიტიკას ან ქმედებას, რომელიც დესტაბილიზაციას ახდენს უკრაინაში ან ძირს უთხრის ან საფრთხეს უქმნის უკრაინის ტერიტორიულ მთლიანობას, სუვერენიტეტს ან დამოუკიდებლობას. კერძოდ, ის რეგულარულად ავრცელებს ისეთ შინაარსის ინფორმაციას, რომ უკრაინის მთავრობა და პრეზიდენტი ზელენსკი არალეგიტიმურია, უკრაინა არის დასავლეთის "მარიონეტი", უკრაინა არის კორუმპირებული ქვეყანა და რომ უკრაინა და დასავლეთი ცდილობენ საქართველოს დესტაბილიზაციას.