დანამდვილებით შეგვიძლია ვთქვათ, რომ ხელოვნური ინტელექტის მქონე ჩატბოტებმა — როგორებიცაა ChatGPT, Gemini AI და სხვები — ჩვენი ცხოვრება რადიკალურად შეცვალა. ზოგიერთი ჩვენგანი მას ისე ხშირად იყენებს, რომ Google-ის არსებობაც კი ავიწყდება და ღამის 3 საათზე უცნაური კითხვებით, მაგალითად, "როგორ იძინებს ჟირაფი?", ჩატბოტებს აწუხებს.

მოდი, გავიხსენოთ, რას ვაკეთებდით მანამ, სანამ ჩატბოტი ჩვენი ყოველდღიურობის ნაწილი გახდებოდა.

1. საშინაო დავალებებს ჩვენით ვწერდით

ხომ არ გახსოვთ ის ბედკრული ღამე დედლაინამდე? — 5000-სიტყვიანი არგუმენტირებული ესეს დასაწერად რომ 1 კვირა გვქონდა, მაგრამ, რატომღაც, ასეთი დავალების წინა დღით შესრულება ბევრად სასიამოვნოდ ჟღერდა.

დღეს ალბათ გაგიჭირდებათ იპოვოთ ისეთი ადამიანი, რომელიც დავალების შესასრულებლად ხელოვნურ ინტელექტს არ იყენებს.

AI ინსტრუმენტები ესეების წერის გარდა, მათემატიკურ ამოცანებს წამებში ხსნის, გვეხმარება იდეების მოფიქრებასა და ტექსტის რედაქტირებაში.

2. ჯანმრთელობის პრობლემებს ექიმს ვუყვებოდით

ჯანმრთელობის პრობლემების შესახებ თავდაპირველად ექიმს ვუყვებოდით, შემდეგ კი ბევრ ჩვენგანს ერთი უცნაური ჩვევა დასჩემდა: ექიმთან ვიზიტის ნაცვლად, საძიებო სისტემებში სიმპტომებს ვწერთ და დიაგნოზს ჩვენივე თავებს ჩვენვე ვუსვამთ.

დღეს ამ საქმეს ჩატბოტები პირნათლად ასრულებენ და სამედიცინო რჩევების მიცემაში ბადალიც არ ჰყავთ.

3. ფსიქოლოგთან დავდიოდით

სამედიცინო რჩევების მიცემის გარდა, ჩატბოტებს ფსიქოლოგისა თუ ფსიქოთერაპევტის ფუნქციაც აქვთ. ცხადია, ეჭვქვეშაა მისი ობიექტურობა და ხშირად ისეთ პასუხებს გვცემს, რომელთა მოსმენაც ყველაზე მეტად გვინდა.

• AI, მხედავ? — როცა ჩატბოტი ფსიქოთერაპევტი ხდება

თუმცა, სანამ ჩვენთვის მნიშნელოვან კითხვებს დაუსვამთ, კარგი იქნება გააანალიზოთ, რომ ის ნამდვილი ადამიანი არ არის.

4. წიგნებს ბოლომდე ვკითხულობდით

სანამ ჩატბოტები ჩვენს ცხოვრებაში გამოჩნდებოდნენ, წიგნის განსახილველად ხელოვნური ინტელექტის ხელსაწყოების გამოყენების ნაცვლად, თავად პოემებსა თუ მოთხრობებს ვკითხულობდით.

წიგნების გარდა, ბოლომდე ვუყურებდით სერიალებსა თუ ფილმებს, ხოლო პერსონაჟების აღსაწერადაც ჩვენს გონებას მოვიშველიებდით ხოლმე.

5. ტექსტის სათარგმნად Google Translate-ს ვიყენებდით

ChatGPT Translate-ის გამოჩენამდე Google Translate ყველაზე კარგად გვეხმარებოდა.

OpenAI-ის განმარტებით, ChatGPT Translate დაახლოებით 50 ენაზე თარგმნის ტექსტებს, ხმოვან მასალასა და სურათებს კი — სულ რამდენიმე წამში.

• Google Translate-ს კონკურენტი გამოუჩნდა? — ChatGPT-ს თარგმნის ცალკე სერვისი დაემატა

მიუხედავად იმისა, რომ Google Translate-სგან განსხვავებით, OpenAI-ის სათარგმნ ინსტრუმენტს აპლიკაცია არ აქვს, ზოგიერთი ჩვენგანისთვის ვებგვერდის სახით თარგმნა ბევრად კომფორტულია.

6. ინფორმაციის მოსაძიებლად ვიკიპედიას ვაწუხებდით

გახსოვთ, ინფორმაციის მოსაძიებლად ბოლოს როდის გამოიყენეთ ვიკიპედია? გარდა იმისა, რომ ვიკიპედიის სანდოობა ეჭვქვეშ დგას, ის დიდ დროსაც გვართმევს. ჩატბოტებს კი ჩვენთვის სასურველი საკითხის მოსაძიებლად სულ რამდენიმე წამი სჭირდებათ.

თანაც, თუ ჩატბოტს ვთხოვთ, რომ შემოთავაზებულ ინფორმაციას თან დაურთოს ბმულები, მათზე გადასვლასა და წყაროდ გამოყენებას მარტივად შევძლებთ.

7. კულინარიულ რეცეპტებს დედებს ან ბებიებს ვეკითხებოდით

ჩატბოტების კიდევ ერთი მნიშვნელოვანი ფუნქცია კულინარიული რეცეპტის წამებში მოფიქრებაა.

თუკი მას თქვენს მაცივარში შენახული პროდუქტების შესახებ ინფორმაციას მიაწვდით და აღნიშნავთ, რა რაოდენობის ინგრედიენტები გაქვთ, ჩატბოტი რამდენიმე წამში რეცეპტების ნუსხას ჩამოგიწერთ.

და თქვენ რას აკეთებდით ჩატბოტების გამოჩენამდე?