დაკავებულია 34 წლის კაცი, რომელმაც, 14 იანვარს, თბილისში, მარჯანიშვილის ქუჩის მიმდებარე ტერიტორიაზე მეზობელი ქალი ბასრი საგნის გამოყენებით მოკლა.

ამის შესახებ შსს განცხადებას ავრცელებს. მათი განმარტებით, განზრახ მკვლელობის ბრალდებით 1991 წელს დაბადებული ა.დ. დააკავეს.

"შინაგან საქმეთა სამინისტროს თბილისის პოლიციის დეპარტამენტის თანამშრომლებმა, განზრახ მკვლელობის ბრალდებით 1991 წელს დაბადებული ა.დ. დააკავეს.
გამოძიებით დადგინდა, რომ ბრალდებულმა მიმდინარე წლის 14 იანვარს, თბილისში, ბასრი საგნის გამოყენებით სასიკვდილო დაზიანებები მიაყენა — 1987 წელს დაბადებულ მ.თ.-ს და შემთხვევის ადგილიდან მიიმალა.

სამართალდამცველებმა ჩატარებული ოპერატიული ღონისძიებებისა და საგამოძიებო მოქმედებების შედეგად, დანაშაულში ბრალდებული ა.დ. მომხდარიდან მალევე, ცხელ კვალზე დააკავეს", — წერია შსს-ს განცხადებაში.

უწყების ცნობით, საქმის ძიება სისხლის სამართლის კოდექსის 108-ე მუხლით მიმდინარეობს, რაც 15 წლამდე ვადით თავისუფლების აღკვეთას გულისხმობს.

ტვ პირველის მიერ გავრცელებული ინფორმაციით, 34 წლის ბრალდებული კაცი "თბილისი ცენტრალის" მიმდებარედ დააკავეს. მათივე ცნობით, ბრალდებულის მეზობლები ხშირად რეკავდნენ 112-ში, შემდეგ კი ის ფსიქიატრიულ დაწესებულებაში გადაჰყავდათ, თუმცა მალევე უკან ბრუნდებოდა. მათივე ცნობით, მოკლული 38 წლის ქალი პროზექტურიდან საკუთარ სახლში უკვე გადმოასვენეს.

შეგახსენებთ, გუშინ, 14 იანვარს, გავრცელდა ინფორმაცია, რომ თბილისში, მარჯანიშვილის ქუჩის მიმდებარე ტერიტორიაზე, ქალი მოკლეს