ირანში საპროტესტო აქციებზე ძალადობის შედეგად დაღუპულთა რიცხვი სულ მცირე 35 ადამიანამდე გაიზარდა, ინფორმაციას AP ავრცელებს.

აშშ-ში დაფუძნებული ორგანიზაცია — Human Rights Activists News Agency-ის ცნობით, მიმდინარე პროტესტის განმავლობაში 1200-ზე მეტი ადამიანია დაკავებული.

მათი ცნობით, დაღუპულთა შორის არის 29 დემონსტრანტი, ოთხი ბავშვი და ირანის უსაფრთხოების ძალების ორი წევრი. საპროტესტო აქციები გაიმართა 250-ზე მეტ ლოკაციაზე, ირანის 31 პროვინციიდან 27-ში.

AP წერს, რომ დაღუპულთა რიცხვის ზრდა ზრდის ამერიკული ჩარევის შესაძლებლობასაც. აშშ-ის პრეზიდენტმა დონალდ ტრამპმა პარასკევს გააფრთხილა ირანი, რომ თუ თეირანი "მშვიდობიან მომიტინგეებს ძალადობრივად მოკლავს", შეერთებული შტატები "მათ დასახმარებლად ჩაერევა".

ცნობისთვის, ბოლო წლებში ირანის ხელისუფლებამ არაერთხელ ჩაახშო პროტესტები მაღალი ფასების, გვალვის, ქალთა უფლებებისა და პოლიტიკური თავისუფლებების გამო, ხშირად მკაცრი უსაფრთხოების ზომებითა და მასობრივი დაკავებებით.

Reuters-ის ინფორმაციით, ირანის ეკონომიკა წლებია სირთულეებს განიცდის, ძირითადად თეირანის ბირთვულ პროგრამასთან დაკავშირებული აშშ-ისა და დასავლეთის სანქციების გამო. ივნისში ისრაელთან 12-დღიანმა საჰაერო ომმა ქვეყნის ფინანსურ მდგომარეობას დამატებითი დარტყმა მიაყენა.

2025 წელს ირანული რიალი დოლართან მიმართებაში დაახლოებით ორჯერ გაუფასურდა, ხოლო ოფიციალურმა ინფლაციამ დეკემბერში 42.5% შეადგინა.

ირანში შეტაკებას რამდენიმე ადამიანი ემსხვერპლა