უწყვეტი პროტესტის მე-400 დღეს აქციის მონაწილეები ახალ წელს რუსთაველის გამზირზე შეხვდებიან. მოქალაქეები 31 დეკემბერს პირველი კლასიკური გიმნაზიის წინ 22:00საათიდან შეიკრიბებიან, წაიკითხავენ სინდისის პატიმრების გზავნილებს, პარლამენტის მიმდებარედ გაიშლება თეთრი, გრძელი ნაჭერი, რომელზეც ყველა მსურველს შეეძლება თავისი მთავარი სათქმელის დაწერა და ყველა მსურველს შეეძლება ნობათის მოტანა.

"31 დეკემბერს, რუსთაველზე, პირველი კლასიკური გიმნაზიის წინ, ილიას და აკაკის ძეგლთან:

22:00 საათზე საზოგადოებას მიმართავენ რუსთაველის გამზირის მცველები — ადამიანები, რომლებიც წელიწადზე მეტია იცავენ ქვეყნის თავისუფლებას და ღირსებას.

23:00 საათიდან გაჟღერდება სინდისის პატიმრების მიერ უწყვეტი პროტესტის მე-400-ე დღისადმი მიძღვნილი გზავნილები იმაზე, თუ რატომ არ უნდა დანებდე, რა უნდა დაუპირისპირო უიმედობას და რა სახელით შევა ეს ბრძოლა ისტორიაში.

23:00 საათიდან, პარლამენტის მიმდებარედ გაიშლება თეთრი, გრძელი ნაჭერი, რომელზეც ყველა მსურველს შეეძლება თავისი მთავარი სათქმელის დაწერა მომავალი თაობებისთვის.
ეს გზავნილები საბოლოო ბინას თბილისის კერძო მუზეუმში დაიდებენ, რომელსაც ჩვენი ერთიანი ძალისხმევით შევქმნით და მასში ერთ-ერთი კუთხე თბილისის ურბანული და პოლიტიკური პროტესტის ისტორიას დაეთმობა.

პირველ გიმნაზიასთან ხელოვანები შემოგვთავაზებენ თავისუფლების სიყვარულით შექმნილ მუსიკალურ და ქორეოგრაფიულ ნაწარმოებებს.

ჩვენს ერთობლივ ახალ წელზე ყველა შემსრულებელი უსასყიდლოდ იზრუნებს.

23:00 საათიდან რუსთაველზე ყველა მსურველს შეეძლება ნობათის მოტანა, ახალი წლისა და უწყვეტი წინააღმდეგობის მე-400-ე დღის ერთად აღსანიშნად.

ჩვენი ქვეყნის დამოუკიდებლობისთვის ერთად დგომა დღეს ისე მნიშვნელოვანია, როგორც — არასდროს!", — წერია აქციის ორგანიზატორების მიერ გავრცელებულ ინფორმაციაში.