ფრანგი კინოვარსკვლავი, მომღერალი, მოდელი და აქტივისტი ბრიჟიტ ბარდო 91 წლის ასაკში გარდაიცვალა. ინფორმაციას მსახიობის დაფუძნებული ფონდი ავრცელებს. ბარდომ, რომელიც ახალგაზრდული მეამბოხეობისა და სილამაზის სიმბოლოდ მიიჩნეოდა, ეპოქალური როლი ითამაშა ცხოველთა უფლებადამცველ აქტივიზმშიც და 1986 წელს დააფუძნა ფონდი, რომელიც 75 ათასამდე წევრს აერთიანებს.

"ბრიჟიტ ბარდოს ფონდი პატივს მიაგებს იმ განუმეორებელი ქალის ხსოვნას, რომელმაც ყველაფერი გაიღო, რათა სამყარო ცხოველებისადმი უფრო ლმობიერი გამხდარიყო", — წერს ფონდი, — "მისი მემკვიდრეობა მუდამ იცოცხლებს ფონდის საქმიანობაში, რომელიც ჩვეული შემართებით და პრინციპებისადმი ერთგულებით გაგრძელდება".

1934 წელს, პარიზის საშუალო კლასის ოჯახში დაბადებული ბრიჟიტ ბარდო, რომელიც ბალერინობას აპირებდა, 15 წლის ასაკში ჟურნალ Elle-ის გარეკანზე მოხვდა და რეჟისორ მარკ ალეგრესა და მისი ასისტენტის, როჟე ვადიმის, ყურადღება მიიქცია. მასზე ექვსი წლით უფროსი ვადიმი მოგვიანებით მსახიობის პარტნიორი გახდა და დიდი როლი ითამაშა ბარდოს ვარსკვლავური კარიერის დაწყებაში.

ბარდომ სამსახიობო კარიერა 1950-იან წლებში დაიწყო და სახელი გაითქვა ღიად ეროტიკულ ფილმებში მონაწილეობით. სექსუალური რევოლუციის ერთ-ერთ მთავარ სიმბოლოდ მიჩნეული ვარსკვლავი სიმონ დე ბოვუარის ესეს ლოლიტას სინდრომის მთავარი გმირიც გახლდათ, რამაც "საფრანგეთში ყველაზე თავისუფალი ქალის" სახელი მოუტანა.

"გოგოები ყველგან ბრიჟიტ ბარდოს მსგავსად დადიან, იცვამენ და იკეთებენ ვარცხნილობას, ნატრობენ, რომ მასავით თავისუფალ პიროვნებად იქცნენ", — წერდა ჟურნალი Life 1961 წელს.

"თავისუფალი ცხოვრების" სიმბოლოდ მოიხსენია ბარდო საფრანგეთის პრეზიდენტმა ემანუელ მაკრონმაც, რომელიც მსახიობის გარდაცვალებას სოციალურ მედიაში გამოეხმაურა.

"მისი ფილმები, მისი ხმა, მისი თვალისმომჭრელი დიდებულება, მისი სახელის ინიციალები, მისი მწუხარება, მისი თავდაუზოგავი ბრძოლა ცხოველთა უფლებებისთვის, მისი სახე, რომელიც მარიანად (საფრანგეთის რესპუბლიკის სიმბოლოდ) იქცა. საუკუნის ლეგენდის დაკარგვას ვგლოვობთ", — დაწერა მაკრონმა X-ზე.

1973 წელს, 39 წლის ასაკში, ბარდომ სამსახიობო კარიერა დაასრულა და გადაწყვიტა, მთელი ძალისხმევა ცხოველთა უფლებების დასაცავად მიემართა.

"ახალგაზრდობა და სილამაზე კაცებს შევწირე, ახლა კი მსურს, ჩემი გამოცდილებით და ჭკუით საუკეთესო არსებებს, ცხოველებს, დავეხმარო", — განაცხადა ბარდომ 1987 წელს, როცა თავისი ფონდისთვის ფინანსების მობილიზებისთვის საკუთარი ნივთები აუქციონზე გასაყიდად გამოიტანა.

ბარდოს საკულტო ფიგურის მნიშვნელოვანი ნაწილი იყო მისი გამორჩეული ჩაცმულობის სტილი და ვარცხნილობა, რამაც ვარსკვლავი მოდის ფუძემდებლადაც კი აქცია.

"იგი ბუნებრივი გახლდათ, ფეხშიშველა დადიოდა, თმას დიდად არ ივარცხნიდა და მაკიაჟს არ ატარებდა. ასეთი იყო თავისუფლებისა და ახალგაზრდობის ხატი", — აღნიშნა ბრიტანელმა წამყვანმა და კოლექციონერმა ჯეიმს ჰაიმენმა 2009 წელს, როცა მსახიობის 75 წლის იუბილესადმი მიძღვნილი ფოტოგამოფენა გაიმართა.

ბარდო თავისი თაობის ვარსკვლავებში გავრცელებულ ტენდენციასაც არ აჰყოლია და ასაკის მატებასა და გარეგნობის ცვლილებას ისე შეხვდა, პლასტიკური ქირურგიისთვის არ მიუმართავს.

ვარსკვლავურ კინოკარიერასა და აქტივიზმთან ერთად, ბრიჟიტ ბარდომ 60-ზე მეტი სიმღერა გამოუშვა და დაწერა ხუთი წიგნი. ბარდოს 1985 წელს საფრანგეთის ყველაზე პრესტიჟული ჯილდო, საპატიო ლეგიონის ორდენი, მიენიჭა.