თბილისის საქალაქო სასამართლოში იმ პირთა სასამართლო პრიოცესები მიმდინარეობს, ვისაც ააქციის დროს ტროტუაარზე დგომას ედავებიან. ყველა მათგანის მოსამართლე მანუჩარ ცაცუაა. ამ დროისთვის ცაცუამ 4 პირის საქმე 2026 წლის იანვრისთვის გადადო. მან ყველა სასამართლო პროცესზე შსს-ს მოსთხოვა, მოეწოდებინათ "ნახევარსაათიანი" ზედხედით გადაღებული კადრები.

სასამართლო ანი ახმეტელს 17 დეკემბერს პარლამენტის მიმდებარედ ხალხის გადაადგილებისთვის დაბრკოლების შექმნას ედავება.

"ვიდეოში ფიქსირდება მოქალაქე, რომელიც 20:35 საათზე დგას ტროტუარზე და დაბრკოლებას უქმნის ხალხს გადაადგილებისას," — წერია მის საქმეში.

შსს-ს წარმომადგენლებმა სასამართლოზე განაცხადეს, რომ 17 დეკემბერს მათმა უწყებამ აქციის ჩატარებაზე ნებართვა არ გასცა და პოლიციამ "ხალხის სავალ ნაწილში" მდგომ მოქალაქეებს მოუწოდა, დაეტოვებინათ ტერიტორია, რასაც ისინი არ დაემორჩილნენ.

ამავე ბრალდებით ედავებიან 73 წლის ნორა ცინცაძესაც — ცინცაძეს პროცესი 12 იანვარს გადაიდო.

"ქალბატონი ნორა ცხოვრობს ტაბიძეზე, იქვე ცხოვრობს და მანდ მიდიოდა ქუჩაში, ნახა ნაცნობები, საღამოს სეირნობდა, ნახა ნაცნობები, ესაუბრებოდა, იდგა ცოტა ხანი. შემდეგ რაღაც გამოსვლები იყო, მაგას მოუსმინა. მანამდე პოლიციის გაფრთხილება არ გაუგონია, არც იცოდა გაფრთხილება თუ იყო. სახლთან ახლოს იყო, ჩაიარა და მეგობრებთან საუბრის დროს გადაუღეს ეს ვიდეო და დაიბარეს," — განაცხადა მისმა ადვოკატმა გიორგი ტაბატაძემ.

აღნიშნულ საქმეზე დაბარებული გიორგი ბულიას და ელენე ჯღარკავას პროცესებიც 12 იანვარს გადაიდო. მანუჩარ ცაცუამ მათზეც "მინიმუმ ნახევარსაათიანი" კადრები მოსთხოვა შსს-ს.

შეგახსენებთ, 10 დეკემბერს, ოცნების ხელისუფლების პარლამენტმა შეკრება-მანიფესტაციის შესახებ კანონში ცვლილებები საბოლოოდ მიიღო. ცვლილებების მიხედვით შეზღუდვა წესდება ხალხის მოძრაობის ადგილას შეკრებაზე და დემონსტრანტებმა შსს 5 დღის ვადაში უნდა გააფრთხილონ. კანონპროექტში ასევე ვკითხულობთ, რომ უქმდება სახდელით სახით აღმკვეთი ღონისძიება და კანონის დარღვევის შემთხვევაში მოქალაქეს პატიმრობა ემუქრება.

აღნიშნული კანონპროექტის დარღვევის შემთხვევაში აქციის მონაწილეს 15 დღემდე პატიმრობა ემუქრება, ორგანიზატორს — 20 დღემდე. თუ ამ მუხლით სახდელდადებული პირი იგივე ქმედებას ჩაიდენს, მას სისხლისსამართლებრივი პასუხისმგბელობა დაეკისრება. სასჯელის სახედ კი გათვალისწინებულია თავისუფლების აღკვეთა ვადით ერთ წლამდე.