ტეილორ სვიფტმა 3 ოქტომბერს ახალი ალბომი — The Life Of A Showgirl გამოუშვა. როგორც ყველაფერი, რასაც სვიფტი აკეთებს, ეს ალბომიც გამოსვლისთანავე სენსაციად იქცა. სენსაციად არა მხოლოდ გაყიდვებითა და მოსმენებით, არამედ იმითაც, თუ რამდენი ადამიანი აალაპარაკა როგორც ალბომზე, ისე თავად ტეილორზე.

სხვა ცნობილი ადამიანების მსგავსად, სვიფტს მუდამ აკვირდებიან როგორც ფანები, ისე კრიტიკოსები. თუმცა ტეილორს სხვა სელებრითებისგან ის გამოარჩევს, რომ კარიერის დასაწყისიდან მომღერალი ფანებთან განსაკუთრებით ახლოსაა — მათ მეგობრებს უწოდებს და საკუთარი პირადი ცხოვრების შესახებ მინიშნებებსაც აძლევს.

ამ დამოკიდებულების შედეგად, დღეს ტეილორის ყველა ქცევასა და პროდუქტს მილიონობით ადამიანი მცირე დეტალებშიც კი აკვირდება — სვიფტის სიმღერები, ტანსაცმელი, მანიკიურის ფერი, ფოტოს წარწერა, ვარცხნილობა, მეგობრები — მისი ცხოვრების ყველა დეტალი მუდამ მინიშნებების საპოვნელად განიხილება, რადგან ფანებს (და არა მხოლოდ) სურთ მეტი იცოდნენ მომღერალზე.

არც ახალი ალბომის გამოსვლა იყო გამონაკლისი — მას შემდეგ სოციალურ პლატფორმებზე რამდენიმე კვირის განმავლობაში აქტიურად განიხილებოდა ალბომის სიმღერების ტექსტები და მერჩის პროდუქტები.

იხილეთ: ტეილორ სვიფტი და Charli XCX — როგორ დაიწყო ორ ვარსკვლავს შორის დაპირისპირება?

თუმცა ეს განხილვა ნორმალურისგან განსხვავდებოდა და მალევე მიიღო ბევრად უფრო რადიკალური სახე, ვიდრე ფანების საყვარელი მომღერლის მიმართ ცნობისმოყვარეობაა. სოციალურ მედიაში გავრცელდა პოსტები, რომლებიც ტეილორს MAGA (Make America Great Again) მოძრაობის, შესაბამისად, დონალდ ტრამპის მხარდაჭერას აბრალებდა, "ტრადიციული ცოლის" გენდერულ ნორმებს მიაწერდა და ამბობდა, რომ მომღერალი შეფარული მინიშნებებით ჩვენთვის თეთრი რასის უპირატესობის გადმოცემასაც კი ცდილობდა.

ტეილორის ფანების ნაწილი დაეჭვდა, რომ ეს ყველაფერი სპეციალურად დაგეგმილი სიძულვილის კამპანია იყო მომღერლის წინააღმდეგ და როგორც ჩანს, ეს ეჭვი მხოლოდ მათ არ გასჩენიათ. ანალიტიკურმა კომპანია GUDEA-მ ჩაატარა კვლევა, რომლის ფარგლებშიც 3 ოქტომბრიდან 18 ოქტომბრის ჩათვლით გამოიკვლია 14 ციფრულ პლატფორმაზე 18 000 მომხმარებლის 24 000 პოსტი. კვლევის შედეგად კომპანიამ დაადგინა, რომ ამ პერიოდის მანძილზე სვიფტის შესახებ საუბრის 28% მომხმარებლების 3.77%-დან მოდიოდა, მათ შორის ის პოსტებიც, რომლებიც მომღერალს ნაცისტობას აბრალებდა.

კვლევის მიხედვით, მომხმარებლები, რომელიც ამ პროცესში მონაწილეობდნენ და ტეილორის ამბავს ეხმიანებოდნენ, ძირითადად, ბოტების შთაბეჭდილებას ტოვებდნენ. პოსტების 40% პროცენტი არაავთენტური ანგარიშების მიერ ზიარდებოდა.

კომპანიის წარმომადგენელმა ასეთ დაკვირვებამდე მივიდა:

მკვლევრებმა აღმოაჩინეს ისიც, რომ იმ მომხმარებლებს შორის, რომლებიც ავრცელებდნენ ჭორებს ტეილორისა და ბლეიკ ლაივლის შესახებ, დიდი გადაკვეთაა. მკვლევრები ფიქრობენ, რომ არსებობს ერთიანი, კოორდინირებული ქსელი, რომელიც მიზანმიმართულად ავრცელებს დეზინფორმაციას ცნობილი ადამიანების შესახებ და გავლენას ახდენს სკანდალების შექმნაზე.