7 ნოემბერს, თბილისის საქალაქო სასამართლოში "ნივთების სათავსო" კარადა დაამონტაჟეს, რომელშიც 960 ადგილია — თითოეული სათავსოს კარი დანომრილია და ჩამკეტით იკეტება. "რადიო თავისუფლების" ინფორმაციით, აღნიშნული კარადები სხვა სასამართლო უწყებებშიც განთავსდება და სახელმწიფოს მათი შეძენა 91 700 ლარი დაუჯდა.

რა ფუნქცია ექნებათ ამ სათავსოებს?

იუსტიციის უმაღლესი საბჭოს 17 ივლისის დადგენილებაში ვკითხულობთ, რომ "სასამართლოს მანდატურმა სასამართლოს ეზოში და შენობაში პირის შესვლისას, ვიზუალურად უნდა შეამოწმოს, ხომ არ შეაქვს პირს სასამართლოში ფოტო-, კინო-, ვიდეოგადაღების, ტრანსლაციის და აუდიოჩაწერის ფუნქციის მქონე ნებისმიერი ტექნიკური საშუალება (გარდა მობილური ტელეფონისა)".

რაც შეეხება სასამართლო დარბაზს, დადგენილებაში ვკითხულობთ, რომ სასამართლოს მანდატურმა არ უნდა დაუშვას პირის მიერ ნებისმიერი ტექნიკური საშუალების შეტანა, მათ შორის მობილური ტელეფონისა. მანდატურს ასევე უფლება აქვს პირს ჩამოართვას ნივთი, რომელიც "ეჭვს ბადებს", რომ ტრანსლაციისა და გადაღების ფუნქცია აქვს.

"სასამართლოს მანდატური უფლებამოსილია არ დაუშვას სასამართლო სხდომის დარბაზში ფოტო-, კინო-, ვიდეოგადაღების, ტრანსლაციის და აუდიოჩაწერის ფუნქციის მქონე ნებისმიერი ტექნიკური საშუალების (მობილური ტელეფონის, აგრეთვე — სხვა ისეთი ნივთის ჩათვლით, რომელიც, ერთი შეხედვით, არ წარმოადგენს ამგვარ ტექნიკურ საშუალებას, თუმცა ვიზუალური დათვალიერების შედეგად აჩენს ვარაუდს, რომ მას გააჩნია ფოტო-, კინო-, ვიდეოგადაღების, ტრანსლაციის და აუდიოჩაწერის ფუნქცია) შეტანა (გამოყენება) და შესთავაზოს მფლობელს, აღნიშნული ტექნიკური საშუალებები გადასცეს დროებით შესანახად მანდატურს," — წერია დადგენილებაში.

დადგენილების მე-4 მუხლში ვკითხულობთ, რომ "გათვალისწინებულ შემთხვევებში დროებით ჩამორთმეული აპარატურა და ტექნიკური საშუალებები სასამართლოს მანდატურმა უნდა შეინახოს საამისოდ განკუთვნილ სპეციალურ საცავში და სასამართლოდან გასვლისას დაუბრუნოს მფლობელს".

შეგახსენებთ, ქართული ოცნების "საერთო სასამართლოების შესახებ" კანონში ცვლილებით, მედიებს სასამართლო პროცესის, შენობის დერეფნის და ეზოს გადაღების უფლება ეზღუდებათ. სასამართლო პროცესების ვიდეო ან აუდიო გადაღების უფლება იუსტიციის უმაღლესი საბჭომ უნდა უზრუნველყოს.

აღნიშნული კანონის ცვლილების შემდეგ ჟურნალისტები სასამართლო პროცესების გაშუქებას ლაივ-ბლოგებით ახორციელებდნენ. მობილური ტელეფონის ჩამორთმევის შემდეგ ჟურნალისტები ვეღარ შეძლებენ სასამართლო პროცესების ზედმიწევნით გაშუქებას. დადგენილებაში ასევე არ არის დაკონკრეტებული, თუ რა ზომებს მიიღებს სასამართლო ნივთის დაკარგვის ან დაზიანების შემთხვევაში.