თბილისის საქალაქო სასამართლომ ყოფილი ცოლის ცემაში და სასამართლოს განაჩენის შეუსრულებლობაში ბრალდებული, განზრახი დანაშაულის ჩადენისთვის პირობითი მსჯავრის ქვეშ მყოფი პირი დამნაშავედ სცნო.

ბრალდებულს სასჯელის სახედ და ზომად 1 წლითა და 6 თვით თავისუფლების აღკვეთა განუსაზღვრა.

როგორც პროკურატურის განცხადებაშია ნათქვამი, დაზარალებულმა სასამართლოში უარი განაცხადა თავისი ყოფილი ქმრის წინააღმდეგ მიეცა ჩვენება.

მიუხედავად ამისა, სასამართლომ დადასტურებულად მიიჩნია, რომ 2017 წლის 17 მარტს, დაახლოებით 21:40 საათზე, ნასვამ მდგომარეობაში მყოფმა პირმა მასთან არარეგისტრირებულ ქორწინებაში მყოფ ქალს ურთიერთშელაპარაკების ნიადაგზე სცემა და ბლაგვი საგნით თავის არეში დაზიანება მიაყენა.

სამართალდამცველებმა ბრალდებული იმავე დღეს თბილისში დააკავეს. მას ბრალდება სისხლის სამართლის კოდექსის 126¹-ე მუხლის პირველი ნაწილით (ოჯახის ერთი წევრის მიერ მეორეს მიმართ ძალადობა, რამაც ფიზიკური ტკივილი გამოიწვია) და 381-ე მუხლის პირველი ნაწილით (სასამართლოს განაჩენის შეუსრულებლობა) წარედგინა.