საკონსტიტუციო ცვლილებებთან დაკავშირებით საქართველოს პრეზიდენტისა და 20-მდე ოპოზიციური პარტიის შეხვედრა შეთანხმებით დასრულდა. პრეზიდენტის ადმინისტრაციის ინფორმაციით:

  • უმრავლესობის მომართვის საფუძველზე, პრეზიდენტი ვეტოში უცვლელად ასახავს უმრავლესობის წინადადებებს;
  • პრეზიდენტი ვეტოში გაიმეორებს ასევე, ქართული ოცნების პოლიტიკური ხელმძღვანელობის პოზიციას 2020 წელს პროპორციულ საარჩევნო სისტემაზე გადასვლასთან დაკავშირებით;
  • პრეზიდენტის არჩევის წესი - მარგველაშვილი სთავაზობს უმრავლესობას, რომ ამ თანამდებობაზე არჩევის საკითხი მომავლში გადაწყვიტოს ორპალატიანმა პარლამენტმა.

პრეზიდენტის განცხადებით, მნიშვნელოვანია, რომ წარმოდგენილი პოზიცია უზრუნველყოფილია პარლამენტში ოპოზიციის ხმებით, რაც განაპირობებს იმას, რომ ქართული ოცნების პრინციპული პოზიციები გატარდება ცხოვრებაში და კონსტიტუცია აღარ იქნება ერთპარტიული დოკუმენტი.

გავრცელებული განცხადების თანახმად, ამავე პოზიციას მხარს უჭერს არასაპარლამენტო ოპოზიციაც:

"ამ ყველაფრის ერთობლიობით, შესაძლებელი იქნება ქართული დემოკრატია გადავიდეს პოლიტიკური დისკუსიის, კომპრომისის და კონსენსუსის მიღწევის ევროპულ სტანდარტზე".

საქართველოს პარლამენტმა კონსტიტუციის პროექტი მესამე მოსმენით მიიღო. კანონპროექტის მიღებას მხარი 117-მა დეპუტატმა დაუჭირა.

კენჭისყრას არ ესწრებოდნენ ნაციონალური მოძრაობისა და ევროპული საქართველოს დეპუტატები. მათ სხდომათა დარბაზი კონსტიტუციის პროექტის მესამე მოსმენით განხილვის დროს დატოვეს.