აზერბაიჯანის სასამართლომ თბილისიდან გატაცებულ ჟურნალისტ აფგან მუხტარლის შინაპატიმრობაზე უარი უთხრა. ჟურნალისტის, ხადიჯა ისმაილოვას ცნობით, მუხტარლიმ წონაში დაახლოებით 30 კილოგრამი დაიკლო.

"წინასწარ პატიმრობაში მყოფმა მუხტარლიმ განაცხადა, რომ ბევრი შეზღუდვა აქვს დაწესებული. არ ეძლევა შეხვედრების უფლება, შეზღუდული აქვს ზარების განხორციელების უფლება, წიგნები ცენზურას გადიან", - წერს ისმაილოვა.

მეხუთე თვეა, თბილისიდან გატაცებული აზერბაიჯანელი გამომძიებელი ჟურნალისტი, აფგან მუხტარლი ბაქოს ციხეში იმყოფება და წინასწარი პატიმრობა აქვს მისჯილი. აზერბაიჯანის ხელისუფლება ჟურნალისტს სახელმწიფო საზღვრის უკანონოდ გადაკვეთას და კონტრაბანდას ედავება, თუმცა ჟურნალისტის პასპორტი და სხვა დოკუმენტები თბილისშია. თავად მუხტარლი კი ამბობს, რომ ის საქართველოს დედაქალაქიდან კრიმინალური პოლიციის ფორმიანმა პირებმა გაიტაცეს.

საქართველოში შსს-მ გამოძიება სისხლის სამართლის კოდექსის 143-ე მუხლით დაიწყო, რაც თავისუფლების უკანონო აღკვეთას გულისხმობს. აფგან მუხტარლის და ლეილა მუსტაფაევას საქმეს განიხილავს ევროპის ადამიანის უფლებათა დაცვის საერთაშორისო სასამართლო საქმეს მინიჭებული აქვს პრიორიტეტი.