გუშინ, 9 სექტემბერს კახა კალაძის საარჩევნო შტაბთან შეკრებილმა მოქალაქეებმა კახა კალაძის ბანერს კვერცხები ესროლეს და წარწერები გააკეთეს, მათ შორის ­— "რუსული ოცნება". მოგვიანებით სამთავრობო ტელეკომპანია "იმედმა" გაავრცელა ინფორმაცია, რომ შინაგან საქმეთა სამინისტრომ კახა კალაძის საარჩევნო შტაბთან ბანერების დაზიანების ფაქტზე გამოძიება 187-ე მუხლით დაიწყო, რაც გულისხმობს სხვისი ნივთის დაზიანებას ან განადგურებას.

მათივე ცნობით, "კახა კალაძის საარჩევნო შტაბთან ექსპერტები გვიან ღამემდე მუშაობდნენ".

მას შემდეგ, რაც შტაბთან შეკრებილმა მოქალაქეებმა ტერიტორია დატოვეს და მსვლელობით პარლამენტისკენ წავიდნენ, ბანერებზე წარწერები წაშალეს.

კახა კალაძის შტაბთან ხალხმრავალი აქციები რამდენიმე დღეა იმართება. 8 სექტემბერს მელიქიშვილის გამზირზე ოცნების მხარდამჭერები ფიზიკურად დაუპირისპირდნენ იქ შეკრებილ მოქალაქეებს, აქტივისტებსა და ჟურნალისტებს. ე.წ. ტიტუშკებმა იძალადეს "პუბლიკის", "ნეტგაზეთის" და ასევე უნგრელ ჟურნალისტ ლასლო მეზეშზე. ის სასწრაფო დახმარების ეკიპაჟმა კლინიკაში გადაიყვანა. ამ დრომდე არც ერთი მოძალადე დაკავებული არ არის.

შინაგან საქმეთა სამინისტრომ მელიქიშვილის გამზირზე მომხდარ დაპირისპირებასთან დაკავშირებით გამოძიება ჯგუფური ძალადობის მუხლოთ დაიწყო. მოგვიანებით, გეკალ გელაძის უწყებამ გაავრცელა ინფორმაცია, რომ გამოძიება ჯგუფურად ჩადენილ ძალადობისა და წინასაარჩევნო კამპანიის დროს ძალადობის მუხლითაა დაწყებული.