ბუნდესტაგის კოალიციური ფრაქციის ლიდერები — იენს შპანი (გერმანიის ქრისტიან-დემოკრატიული კავშირი, CDU/CSU) და მატიას მირში (გერმანიის სოციალ-დემოკრატიული პარტია, SPD) — კიევში ჩავიდნენ. ამის შესახებ ინფორმაციას უკრაინული მედია ავრცელებს.

აღსანიშნავია, რომ ეს არის CDU/CSU-სა და SPD-ს საპარლამენტო ჯგუფების ხელმძღვანელების პირველი ერთობლივი ვიზიტი უკრაინაში, ასევე შპანისა და მირშისთვის — პირველი ვიზიტი ქვეყანაში.

კიევში ისინი გეგმავენ ისაუბრონ გერმანიის უკრაინისადმი მხარდაჭერის გაგრძელებაზე და ომის დასრულებისკენ მიმართულ დიპლომატიურ ძალისხმევაზე.

"მატიას მირშთან ერთად აქ ვართ, რათა მკაფიო სიგნალი გავაგზავნოთ: CDU/CSU-სა და SPD-ს მმართველი ფრაქციები ახლა და მომავალშიც უკრაინისა და მამაცი უკრაინელების გვერდით დგანან, რომლებიც იცავენ საკუთარ სამშობლოს, ქვეყანას და ევროპასაც", — თქვა იენს შპანმა.