იტალიურმა ორგანიზაციამ, რომლის სასწავლო პროგრამა ქართველმა სტუდენტმა, ქრისტინა არაქელოვამ დატოვა და მიზეზად აფხაზეთის დამოუკიდებელ სახელმწიფოდ მოხსენიება დაასახელა, განცხადება გაავრცელა.

ორგანიზაციის განცხადებაში ნათქვამია, რომ ორგანიზაცია ნეიტრალური და უპარტიო ასოციაციაა. მათი თქმით, ისინი კონფლიქტის ზონებიდან ჩამოსულ ახალგაზრდებთან მუშაობენ, რათა დიალოგის გზით კონფლიქტი აღმოფხვრან. მათივე განმარტებით, არც საგარეო და არც საშინაო პოლიტიკაში, ასევე ტერიტორიულ საკითხებში არანაირ პოზიციას არ იჭერენ.

"ამ მიზეზების გამო, ჩვენ ვიღებთ ყველა იმ ახალგაზრდის დროშას, ვინც აქ ცხოვრობდა ან ცხოვრობს. ორგანიზაცია მიესალმება ინდივიდს, მის ისტორიასა და ოჯახს, რომელიც პირდაპირ დაკავშირებულია მის ხალხთან."

ორგანიზაციის თქმით, 5 სექტემბრიდან ქრსიტინა არაქლოევა აღარ არის პროგრამის წევრი, რადგან სწავლების გამოსაცდელი ვადა ვერ გაიარა.

ქართველმა სტუდენტმა ქრისტინა არაქელოვამ განაცხადა, რომ იტალიაში ორწლიან სწავლებაზე უარს ამბობს. ამის მიზეზად მან პროგრამის წარმომადგენლების მხრიდან, აფხაზეთის დამოუკიდებელ სახელმწიფოდ მოხსენიებას ასახელებს.

არაქელოვას თქმით, აფხაზეთის დროშა სუვერენული სახელმწიფოების, მათ შორის, საქართველოს დროშის გვერდით ჰკიდია. მისივე თქმით, პროტესტის გამოხატვის შემდეგ, ორგანიზაციის პრეზიდენტმა უთხრა, რომ ოფიციალურ შეხვედრებზე საქართველოს ოკუპირებულ რეგიონს დამოუკიდებელ ქვეყნად არ მოიხსენიებდა, თუმცა, ეს ასე არ აღმოჩნდა.