საერთაშორისო გამჭვირვალობა — საქართველო ქართულ ოცნებასთან დაახლოებული დასანქცირებული პირების შესახებ ინფორმაციას და მათ სრულ სიას აქვეყნებს. მათი ინფორმაციით, დასავლურმა სამყარომ ქართული ოცნების 230-ზე მეტი წარმომადგენელი უკვე დაასანქცირა, რომელთაგან 138-ის ვინაობა გასაჯაროვდა, ხოლო დანარჩენებზე ანონიმური სავიზო / სამოგზაურო შეზღუდვებია დაწესებული.

"დემოკრატიული ქვეყნები ამ პირებს მშვიდობიანი მომიტინგეების სასტიკი დარბევის, დემოკრატიისთვის ძირის გამოთხრის, ევროინტეგრაციის პროცესის შეჩერების, საქართველოში რუსული ინტერესების გატარების, არჩევნების გაყალბების, კორუფციის, პროპაგანდის და ქართველი ხალხის ნების წინააღმდეგ წასვლის გამო ასანქცირებენ," — წერია განცხადებაში.

ქართულ ოცნებასთან დაახლოებულ პირებს რამდენიმე სახის სანქციები შეეხოთ.

მაგალითად:

ანონიმური სანქციები (სავიზო შეზღუდვა / ქვეყანაში შესვლის აკრძალვა);

უვიზო რეჟიმის გაუქმება ქართული დიპლომატიური და სამსახურებრივი პასპორტებისთვის.

2025 წლის 13 თებერვალს ევროპარლამენტმა მიიღო რეზოლუცია, რომელიც 31 ადამიანის დასანქცირებას ითხოვს;

"2025 წლის 15 ივლისს, ევროკავშირის საგარეო საქმეთა მინისტრების შეხვედრის ფარგლებში, ევროკავშირის საგარეო საქმეთა უმაღლესმა წარმომადგენელმა, კაია კალასმა, ჟურნალისტებს დაუდასტურა, რომ ევროკავშირის საგარეო საქმეთა მინისტრებს ჰქონდათ სანქციებისთვის მზად 15 საქართველოს მოქალაქის სია, რომელშიც ორი მოსამართლე შედიოდა. თუმცა, ევროსაბჭოში კონსენსუსის არარსებობის გამო, სანქციების დაწესების შესახებ გადაწყვეტილების მიღება გადაიდო," — წერია განცხადებაში.