აზერბაიჯანი ემზადება, რომ რუსეთის წინააღმდეგ საერთაშორისო სასამართლოებში სარჩელი შეიტანოს "აზერბაიჯანის ავიახაზების" (AZAL) თვითმფრინავის ჩამოვარდნასთან დაკავშირებით, ამის შესახებ პრეზიდენტმა ილჰამ ალიევმა განაცხადა. ინფორმაციას ადგილობრივი გამოცემა Minval ავრცელებს.

ალიევის თქმით, AZAL-ის თვითმფრინავთან დაკავშირებული სიტუაცია "დღესავით ნათელია".

"ჩვენ ვიცით, რა მოხდა და შეგვიძლია ამის დამტკიცება. და ჩვენ ვიცით, რომ რუსმა ოფიციალურმა პირებმაც იციან, რა მოხდა", — ალიევის კომენტარს Report ციტირებს.

შვიდი თვის განმავლობაში აზერბაიჯანს რუსეთისგან "არანაირი პასუხი" არ მიუღია, აღნიშნა ალიევმა. აზერბაიჯანის გენერალური პროკურორის მიერ რუსეთის საგამოძიებო კომიტეტის ხელმძღვანელისთვის გაგზავნილ შეკითხვებზე პასუხად მხოლოდ ერთი პასუხი მოდის: "გამოძიება მიმდინარეობს", — განაცხადა აზერბაიჯანის პრეზიდენტმა და ამ პოზიციას კონტრპროდუქტიული უწოდა.

ალიევმა გაიხსენა, რომ Malaysia Airlines-ის Boeing 777-ის ჩამოვარდნის გამოძიება 10 წელზე მეტხანს გაგრძელდა და აზერბაიჯანი მზადაა დაელოდოს "რამდენ ხანსაც დასჭირდება".

"აზერბაიჯანის ავიახაზების" თვითმფრინავი, რომელიც ბაქოდან გროზნოში მიფრინავდა, გასული წლის 25 დეკემბერს ყაზახეთში, აქტაუს მახლობლად ჩამოვარდა. ყაზახეთის ტრანსპორტის სამინისტროს ცნობით, ბორტზე იმყოფებოდა აზერბაიჯანის 37 მოქალაქე, ყაზახეთის ექვსი მოქალაქე, ყირგიზეთის სამი მოქალაქე და რუსეთის 16 მოქალაქე — სულ 62 მგზავრი და ეკიპაჟის ხუთი წევრი. დაშვების დროს მომხდარი ავარიის შედეგად 38 ადამიანი დაიღუპა.

აზერბაიჯანული თვითმფრინავი

"როსავიაციამ" თავდაპირველად განაცხადა, რომ თვითმფრინავი ფრინველებთან შეჯახების გამო ჩამოვარდა. მოგვიანებით, AZAL-მა ავარიის წინასწარ მიზეზად "გარე ფიზიკური და ტექნიკური ზემოქმედება" დაასახელა. დეკემბრის ბოლოს ვლადიმერ პუტინმა ალიევს დაურეკა და თვითმფრინავის ჩამოვარდნასთან დაკავშირებით ბოდიში მოუხადა.

აზერბაიჯანის პრეზიდენტმა განაცხადა, რომ თვითმფრინავი ხმელეთიდან გახსნილი ცეცხლის შედეგად დაზიანდა. მან ხაზგასმით აღნიშნა, რომ თვითმფრინავი განზრახ არ ჩამოუგდიათ, თუმცა ბოდვა უწოდა ვერსიები, რომ თვითმფრინავი ფრინველთა გუნდთან შეჯახების ან თვითმფრინავში არსებული გაზის ბალონის აფეთქების გამო ჩამოვარდა. ალიევმა ასევე მოითხოვა, რომ რუსეთმა აღიაროს ინციდენტზე პასუხისმგებლობა, პასუხისმგებლები პასუხისგებაში მისცენ და აზერბაიჯანს, დაშავებულ მგზავრებსა და ეკიპაჟის წევრებს კომპენსაცია გადაუხადოს.