"ეს არის სისტემური მკვლელობა, შვილი მომიკლეს, დამიღუპეს უპასუხისმგებლობის, უყურადღებობის, საქმისადმი გულგრილი, არაკეთილსინდისიერი დამოკიდებულებით" — ასეთია 2 წლის წინ, წყნეთში გარდაცვლილი დათუნა ჟღენტის დედის, ქეთი ჟღენტის პირველი კომენტარი შვილის გარდაცვალებაზე.

ტელეკომპანია "პირველისთვის" მიცემულ ინტერვიუში ქეთი ჟღენტი ამბობს, რომ ის კვლავ დამნაშავეების დასჯის მოლოდინშია, რადგან ამ საქმეზე პასუხისგებაში არავინაა მიცემული.

შეგახსენებთ, 2 წლის წინ, 15 წლის კალათბურთელი დათუნა ჟღენტი, წყნეთის ერთ-ერთ სკვერში დენის დარტყმის შედეგად გარდაიცვალა. მოზარდი დედამ სკამზე გარდაცვლილი ნახა. საქმეზე გამოძიება ამ დრომდე მიმდინარეობს.

"პირველივე დღეებში გავრცელდა ინფორმაცია, რომ ვიღაც ორი პიროვნება იყო დაკავებული — სრული სიცრუე, არავინ. მეც ასე მეგონა და ამის დარდი არ მქონდა, სამედიცინო დასკვნის მოლოდინში ვიყავი. მას შემდეგ, რაც საქმეში ჩავერთე, მე თვითონ მომიწია პათანატომთან დარეკვა...

საქმე გადაეცა გია შაიშმელაშვილს. დღესდღეობით ამ საქმის პროკურორი არის გია შაიშმელაშვილი, რომელთანაც მქონდა მრავალგზის სატელეფონო კომუნიკაცია და, სავარაუდოდ, 3-4-ჯერ გვქონდა შეხვედრა. იყო დაპირებები, იყო რაღაცები, მაგრამ... შეიქმნა ოთხტომნახევარი ამ საქმესთან დაკავშირებით, რომელიც იმ ორ დღეში გაკეთდა. გავიდა ორი წელი, მეტი არაფერი გაკეთებულა. ანუ, არ გვყავს ეჭვმიტანილი, არ გვყავს ბრალდებული, თავისთავად არავინ არ არის დაჭერილი, არავინ. პასუხისმგებლობა არავინ არ აიღო.

ახლა სრულად თავისუფლად ვაცხადებ: ეს არის სისტემური მკვლელობა, შვილი მომიკლეს, დამიღუპეს უპასუხისმგებლობის, უყურადღებობის, საქმისადმი გულგრილი, არაკეთილსინდისიერი დამოკიდებულებით. სწორედ ამ ყველაფერმა გამოიწვია, რომ დათუნა დღეს ჩემს გვერდზე არ არის.

გამგებელთან პირველი შეკითხვა ეს იყო — გაქვთ თუ არა დანაშაულის და პასუხისმგებლობის შეგრძნება —ადამიანმა დამეთანხმა, კი, მაქვს, ოღონდ დამნაშავედ არ ვგრძნობ თავსო. თუ სასამართლო მცნობს დამნაშავედ, კიო" — განაცხადა ქეთი ჟღენტმა.

გამოძიება 240-ე მუხლით არის დაწყებული, რაც სარეაბილიტაციო სამუშაოების დროს უსაფრთხოების წესების დარღვევას გულისხმობს.