უკრაინის გრძელვადიანი მხარდაჭერისთვის ევროკავშირი ახალი, 100 მილიარდი ევროს მოცულობის ფონდის შექმნას გეგმავს, მაშინ როცა ევროპა ომის დასრულების არანაირ ნიშნებს ვერ ხედავს — ამის შესახებ Bloomberg გვატყობინებს.

Bloomberg-ის ინფორმაციით, ეს თანხა შესაძლოა ევროკავშირის შვიდწლიანი ბიუჯეტის წინადადებაში შევიდეს, რომლის წარმოდგენაც ივლისშია დაგეგმილი. შეთანხმების შემთხვევაში, დაფინანსება 2028 წლიდან დაიწყება და უკრაინას სტაბილურ მხარდაჭერას უზრუნველყოფს.

აღსანიშნავია, რომ რუსეთის სრულმასშტაბიანი ომის დაწყებიდან სამი წლის განმავლობაში ევროკავშირმა უკრაინას თითქმის 160 მილიარდი ევრო გამოუყო. მათ შორისაა 50 მილიარდი ევროს ოდენობის გრანტებისა და სესხების პაკეტი, რომელიც 2027 წლამდეა გათვლილი. გარდა ამისა, G7-ის ქვეყნებთან ერთად ევროკავშირმა შექმნა 50 მილიარდი აშშ დოლარის ოდენობის საკრედიტო მექანიზმი, რომელიც გაყინული რუსული აქტივებიდან მიღებულ შემოსავლებზეა დაფუძნებული.

8 ივლისს, ევროკავშირის ეკონომიკის კომისარმა ვალდის დომბროვსკისმა ჟურნალისტებთან განაცხადა, რომ ევროკავშირი ამჟამად სხვადასხვა ვარიანტს განიხილავს იმისთვის, რომ მომავალ წელს დაფინანსება უზრუნველყოს.

"ევროკავშირი მზადაა, უკრაინას გაუწიოს საჭირო დახმარება იმდენ ხანს, რამდენიც ეს იქნება საჭირო," — თქვა მან.

დომბროვსკისის თქმით, ევროპული კომისია ასევე სწავლობს შესაძლებლობებს, გაიზარდოს დახმარება არა მხოლოდ ევროკავშირის ბიუჯეტიდან, არამედ გაყინული რუსული სახელმწიფო აქტივებიდან მიღებული შემოსავლების მეშვეობით — მას შემდეგ, რაც საერთაშორისო სავალუტო ფონდი უკრაინის ფინანსურ კრიზისს შეაფასებს.