ჰოლივუდის ვარსკვლავი რობერტ დე ნირო ამბობს, რომ თავის ქალიშვილს, ტრანსგენდერ ქალს, აირინს, მხარს უჭერს.

მსახიობმა ჟურნალ Variety-სთან საუბრისას თავისი შვილიც ახსენა: "აარონი მიყვარდა და მხარს ვუჭერდი, როცა ჩემი ვაჟი იყო, ახლა კი აირინიც მიყვარს და მხარს ვუჭერ, როგორც ჩემს ქალიშვილს."

"ვერ ვხვდები, დიდი ამბავი რა არის. ყველა ჩემი შვილი მიყვარს," — აღნიშნა დე ნირომ.

აირინი დე ნიროსა და ამერიკელი მსახიობისა და მოდელის, ტუკი სმითის შვილია. მან ლგბტ+ გამოცემასთან, Them-თან ინტერვიუში თავის გამოცდილებაზე, ახალ იდენტობასა და ტრანსგენდერთა ცხოვრებაზე ისაუბრა. მისი თქმით, ტრანსგენდერი მსახიობი, ლავერნ კოქსი მისთვის შთაგონება იყო და რომ ისიც იმედოვნებს ტრანსგენდერთა ხილვადობაში როლის შესრულებას.

აირინ დე ნირო

აირინ დე ნირო

ფოტო: them

"ვუყურებ ტრანსგენდერ ქალებს, რომლებიც გულწრფელები და ღიები არიან საჯარო სივრცეებში, მათ შორის სოციალურ ქსელებში, ვხედავ მათ წარმატებას და ვფიქრობ, რომ არც ჩემთვისაა გვიანი," — თქვა აირინმა.

გამოცემა იმითაც დაინტერესდა, თუ როგორი გამოცდილება იყო აირინის ახალი იდენტობა მისი მშობლებისთვის — "არცერთი მშობელი არაა იდეალური, მაგრამ მადლიერი ვარ, რომ ჩემმა ორივე მშობელმა გაითვალისწინა ჩემი თხოვნა ყურადღების ცენტრიდან გარიდების შესახებ. ისინი მუდამ ცდილობდნენ, რაც შეიძლება ნორმალური ცხოვრება მქონოდა," — თქვა 29 წლის აირინმა.