ამერიკის შეერთებული შტატების პრეზიდენტ დონალდ ტრამპის განცხადებით, 18 მარტს ის რუსეთის პრეზიდენტ ვლადიმერ პუტინთან უკრაინაში ომის დასრულებაზე ისაუბრებს — ამის შესახებ Reuter-ში ვკითხულობთ. ტრამპმა მედიასთან საუბრისას ასევე დასძინა, ამ საკითხზე "ბევრი იმუშავეს შაბათ-კვირას".

"ჩვენ გვინდა ვნახოთ, შევძლებთ თუ არა ამ ომის დასრულებას. შესაძლოა, ჩვენ შეგვიძლია, შეიძლება არ შეგვიძლია, მაგრამ ვფიქრობ, რომ ჩვენ გვაქვს ძალიან კარგი შანსი," — განაცხადა ტრამპმა.

კითხვაზე, თუ რა დათმობები განიხილება ცეცხლის შეწყვეტის შესახებ მოლაპარაკებებში, ტრამპმა უპასუხა — "ჩვენ ვისაუბრებთ მიწაზე. ჩვენ ვისაუბრებთ ელექტროსადგურებზე".

"ვფიქრობ, ჩვენ უკვე ბევრი გვაქვს განხილული ორივე მხრიდან, უკრაინის და რუსეთის მხრიდან. ჩვენ უკვე ვსაუბრობთ ამაზე, გარკვეული აქტივების გაყოფაზე," — აღნიშნა ტრამპმა.

ტრამპმა მედიასთან საუბრისას ასევე განაცხადა, რომ უკრაინასთან უფრო რთულია მისთვის მუშაობა, ვიდრე რუსეთთან. შეგახსენებთ, გასულ თვეში თეთრ სახლში დაძაბული შეხვედრა გაიმართა უკრაინის პრეზიდენტთან ვოლოდიმირ ზელენსკისა და დონალდ ტრამპს შორის, რომელიც უკრაინის ლიდერის თეთრი სახლის ადრე დატოვებით დასრულდა.

შეგახსენებთ, 13 მარტს რუსეთმა შეერთებულ შტატებს უკრაინის წინააღმდეგ ომის დასრულებისა და ვაშინგტონთან ურთიერთობების აღდგენის შესახებ შეთანხმების მოთხოვნების სია წარუდგინა. უცნობია კონკრეტული დეტალები რა მოთხოვნები შეიტანა მოსკოვმა აღნიშნულ სიაში ან მზად არის თუ არა ჩაერთოს კიევთან სამშვიდობო მოლაპარაკებებში მათ მიღებამდე.