აშშ-ის სახაზინო დეპარტამენტმა ირანის ნავთობის მინისტრი, მოჰსენ პაკნეჯადი და ჰონგ-კონგის დროშის ქვეშ მცურავი არაერთი ტანკერი დაასანქცირა, რომლებიც, უწყების ცნობით, ე.წ "ჩრდილოვანი ფლოტის" საქმიანობაში იყვნენ ჩართული.

დოკუმენტში ვკითხულობთ, რომ პაკნეჯადი ათეულობით მილიარდი დოლარის ღირებულების ირანული ნავთობის ექსპორტს ზედამხედველობდა.

სახაზინო დეპარტამენტმა სანქციების სიაში შეიყვანა "ჩრდილოვანი ფლოტის" ხსენებული გემების ოპერატორებიც, რომელთაც ირანული ნავთობი ჩინეთში გაჰქონდათ.

ირანის არმია ეყრდნობა ძალიან დიდ ჩრდილოვან ფლოტს, რომელიც მილიარდობით დოლარის ღირებულების ნავთობის გადაზიდვებს ახორციელებს.

კომპანიები, რომლებიც სიაში მოხვდნენ, არიან ჰონგ-კონგური Peace Hill, მისი მფლობელი კომპანია Hong Kong Heshun Transportation Trading Limited, ირანული Polaris 1, სეიშელებზე რეგისტრირებული Fallon Shipping Company Ltd და ლიბერიაში რეგისტრირებული Itaugua Services Inc.