აშშ-ის პრეზიდენტ დონალდ ტრამპის განცხადებით, შესაძლოა, ამერიკამ ე.წ "ოქროს ბარათების" გაყიდვა დაიწყოს, რომელსაც 5 მილიონ დოლარად მდიდარი უცხოელები შეიძენენ და ამით აშშ-ში ცხოვრებისა და მუშაობის უფლებას მიიღებენ, რაც მათ მოქალაქეობისკენ გზას გაუხსნის.

"ჩვენ ოქროს ბარათებს გავყიდით. თქვენ გაქვთ მწვანე ბარათები, ეს ოქროს ბარათია. მისი ფასი დაახლოებით 5 მილიონი დოლარი იქნება და ის მოგცემთ მწვანე ბარათის პრივილეგიებს — დამატებით, ის გზას გახსნის მოქალაქეობისკენ და მდიდარ ადამიანები ამ ბარათის შეძენით ჩვენს ქვეყანაში ჩამოვლენ", — განაცხადა ტრამპმა.

აშშ-ის პრეზიდენტის განცხადებით, ბარათების გაყიდვა 2 კვირაში დაიწყება და მილიონობით ასეთი ბარათი შეიძლება გაიყიდოს. კითხვაზე, მიჰყიდის თუ არა ის "ოქროს ბარათს" რუს ოლიგარქებს, ტრამპმა განაცხადა, რომ კი, რადგან "იცნობს რამდენიმე რუს ოლიგარქს, რომლებიც ძალიან კარგი პიროვნებები არიან".

ვაჭრობის მდივანმა ჰოვარდ ლუტნიკმა თქვა, რომ ოქროს ბარათი ჩაანაცვლებს სამთავრობო EB-5 ინვესტორთა საიმიგრაციო სავიზო პროგრამას, რომელიც უცხოელ ინვესტორებს საშუალებას აძლევს, ჩადონ ფული აშშ-ის პროექტებში, რომლებიც ქმნიან სამუშაო ადგილებს, შემდეგ კი მიმართონ საიმიგრაციო ვიზისთვის.