"მინდოდა, დამეჯერებინა, რომ იმდენად მართალი ვიყავი, ამის დანახვა ვინმეს თუ უნდოდა, აუცილებლად დაინახავდა, მაგრამ, სამწუხაროდ, ვერ დაინახეს. მე და ბაჩოს [ქაჯაია] სადამსჯელო ღონისძიება ჩაგვიტარეს და ხუთი ათასლარიანი ჯარიმა დაგვაკისრეს," — განაცხადა მსახიობმა ანა ტყებუჩავამ ჟურნალისტებთან სასამართლო სხდომის დასრულების შემდეგ.

მისი თქმით, "იმდენად ცალსახაა სიმართლე და იმდენად ცხვირწინაა, თუ მისი დანახვა გინდა, აუცილებლად დაინახავ".

ბაჩო ქაჯაიას თქმით, ის ისურვებდა, მოსამართლე იმ ტვირთისგან გათავისუფლებულიყო, რომელიც უამრავი ადამიანის მიმართ იძულებით ააღებინეს.

"ჩვენ გვქონდა მტკიცებულება იმის შესახებ, რომ გადაკეტილ გზაზე მივედით.

მოსამართლის შეფასებას რაც შეეხება, მართლა გულწრფელად მეცოდება, რადგან ადამიანები, რომლებსაც უწევთ თეთრზე თქვან შავიაო, ადამიანურად კვდებიან. ამ სიკვდილის ყურება ძალიან რთულია. მე მართლა ვუსურვებ, რომ ეს ტვირთი, რომელიც არა მხოლოდ ჩემი და ანას [ტყებუჩავა] შემთხვევაში, დარწმუნებული ვარ, ბევრი ადამიანის შემთხვევაში აქვს აღებული, მოხსნოდეს, ადამიანურად ვუსამძიმრებ მას," — განაცხადა ბაჩო ქაჯაიამ.

შეგახსენებთ, მსახიობები ბაჩო ქაჯაია და ანა ტყებუჩავა სასამართლომ ადმინისტრაციულ სამართალდამრღვევად ცნო და ადმინისტრაციული სახდელის სახით 5000-ლარიანი ჯარიმა დააკისრა.

მათ ადმინისტრაციულ სამართალდარღვევათა კოდექსის 174-ე პრიმა მუხლის მეოთხე ნაწილით გათვალისწინებული ქმედების ჩადენას ედავებოდნენ. კერძოდ კი იმას, რომ ის 9 იანვარს, რუსთაველის გამზირზე მიმდინარე საპროტესტო აქციაზე იმყოფებოდა და გზა ხელოვნურად იმ დროს გადაკეტა, როცა ამისთვის ადამიანების საკმარისი რაოდენობა არ იყო.