დღეს, 18 თებერვალს რუსმა და ამერიკელმა დიპლომატებმა საუდის არაბეთში, უკრაინის წარმომადგენლის გარეშე, მოლაპარაკებები გამართეს.

აშშ-ის დელეგაციას სახელმწიფო მდივანი მარკო რუბიო, ხოლო რუსულ დელეგაციას საგარეო საქმეთა მინისტრი სერგეი ლავროვი ხელმძღვანელობდა.

მხარეები რუსეთის უკრაინაში მიმდინარე აგრესიის დასრულების შესაძლებლობების განსახილველად შეიკრიბნენ, ასევე განიხილეს ვლადიმერ პუტინისა და დონალდ ტრამპის პირისპირ შეხვედრის შესაძლებლობები.

მოლაპარაკებებზე ცეცხლის შეწყვეტასთან ერთად გაისმა უკრაინაში ხელახალი არჩევნების ჩატარების მოთხოვნაც. სახელმწიფო დეპარტამენტის პრესსპიკერმა ტემი ბრიუსმა დაადასტურა, რომ რუბიოს გუნდმა საფუძველი ჩაუყარა რუსეთთან კოოპერაციას და მხარეები შეთანხმდნენ, რომ დაინიშნება "მაღალი დონის გუნდები", რომლებიც მუშაობას დაიწყებენ კონფლიქტის დასრულებაზე.

სხვადასხვა დიპლომატიურ წყაროზე დაყრდნობით, Fox News წერს, რომ უკრაინისათვის ხელახალი არჩევნების ჩატარების იძულება სამშვიდობო შეთანხმების საკვანძო პუნქტი შეიძლება იყოს. წყაროს ცნობით, ორივე მხარე თვლის, რომ პრეზიდენტ ვოლოდიმირ ზელენსკის ხელახლა არჩევის დაბალი შანსი აქვს.

"პუტინი განიხილავს მარიონეტი პრეზიდენტის არჩვის შესაძლებლობას, როგორც საკმაოდ მაღალს და დარწმუნებულია, რომ ზელენსკისგან განსხვავებული ნებისმიერი კანდიდატი უფრო მოქნილი და მზადმყოფი იქნება მოლაპარაკებებისა და დათმობებისათვის", — წერს Fox News წყაროზე დაყრდნობით.

ზელენსკიმ 17 თებერვალს განაცხადა, რომ მისი ქვეყანა არასდროს დათანხმდება სამშვიდობო პირობებს, რომელთა შემუშავებაშიც უკრაინა არ იქნება ჩართული. დონალდ ტრამპის განცხადებით, უკრაინა გაფართოებულ პროცესში ჩართული ნამდვილად იქნება.

შეხვედრის შემდეგ კომენტარი გააკეთა რუსეთის საგარეო საქმეთა სამინისტროს პრესსპიკერმა, მარია ზახაროვამაც — ზახაროვას განცხადებით, უკრაინის NATO-ში გაწევრიანება რუსეთისთვის მიუღებელია და ჩრდილოატლანტიკურმა ორგანიზაციამ უკან უნდა წაიღოს 2008 წელს ბუქარესტის სამიტზე გაცემული პირობა იმის შესახებ, რომ უკრაინა ორგანიზაციის წევრი აუცილებლად გახდება.

სავარაუდოდ, ბუქარესტის სამიტის პირობის გაუქმებაში მოიაზრება საქართველოც, რომელმაც, როგორც უკრაინამ, ანალოგიური გარანტია 2008 წლის აპრილში მიიღო.

"უკრაინის NATO-ში გაწევრიანება ჩვენთვის მიუღებელია. ეს ჩვენს უსაფრთხოებას სერიოზულ საფრთხეს შეუქმნის და მთელი ევროპისთვის კატასტროფულ შედეგებს გამოიწვევს. ალიანსმა ბუქარესტის 2008 წლის სამიტის დაპირებები უნდა უარყოს, რომელიც მომავალში უკრაინის ჩრდილო-ატლანტიკურ ბლოკში გაწევრიანების გარანტიას უზრუნველყოფდა", — განაცხადა მარია ზახაროვამ.